3.09c
Երեվան
երկ, դկտ 08
Իրանի արտաքին գործոց նախարար Ապպաս Արաքչին Թեհրանի մէջ հանդիպած է իր թուրք գործընկեր Հաքան Ֆիտանի հետ, հաղորդած է Tasnim News-ը:
Արտաքին գործոց նախարարները շեշտած են երկկողմ համագործակցութեան զարգացման տարբեր ոլորտները, այդ շարքին՝ համատեղ ազատ տնտեսական գօտիներու ստեղծումը եւ նոր սահմանային անցակէտի աշխուժացումը։
«Մօտ ապագային Վան քաղաքին մէջ պիտի բացուի Իրանի նոր գլխաւոր հյուպատոսութիւն։ Հիւպատոսական ծառայութիւններ մատուցելէ բացի, այն կարեւոր դեր պիտի խաղայ սահմանամերձ նահանգներու միջեւ համագործակցութեան ընդլայնման գործին մէջ», -ըսուած է Իրանի արտաքին գործոց նախարարութեան յայտարարութեան մէջ։
Արաքչին եւ Ֆիտանը նաեւ մանրամասն քննարկած են տարածաշրջանային հարցեր, այդ շարքին՝ պաղեստինեան հարցը եւ Կազայի հատուածին մէջ տիրող իրավիճակը։ Անոնք ընդգծած են պաղեստինեան անկլաւին մէջ մարտական գործողութիւնները դադրեցնելու համար համատեղ համագործակցութեան անհրաժեշտութիւնը։
Կողմերը նաեւ ընդգծած են, որ Սուրիոյ կայունութիւնն ու անվտանգութիւնը կախուած են անոր տարածքային ամբողջականութեան պահպանումէն, որ սպառնալիքի տակ է Իսրայէլի գործողութիւններու պատճառով։
