27.09c
Երեվան
հնգ, հնս 26
«Այս կամ յաջորդ շաբաթ Ուքրանիոյ նախագահ Վլատիմիր Զելենսքին կրնայ այցելել Ուաշինկթըն». յայտարարած է ԱՄՆ նախագահ Տանըլտ Թրամփը Ֆրանսայի նախագահ Էմանուէլ Մաքրոնի հետ հանդիպումէն ետք կայացած ասուլիսի ժամանակ։ Ֆրանսայի եւ ԱՄՆ-ի նախագահներու հանդիպումը կայացած է փետրուար 24-ին՝ ուքրանական պատերազմի երրորդ տարելիցի օրը։
Լրագրողներու հարցերուն ի պատասխան՝ Թրամփ նաեւ ըսած է, որ չի գիտեր, թէ երբ պիտի հանդիպի Ռուսիոյ նախագահ Վլատիմիր Փութինի հետ:
«Ես չեմ գիտեր, թէ երբ մենք պիտի խօսինք, –ըսած է ան: – Ինչ-որ պահի ես պիտի հանդիպիմ նախագահ Փութինի հետ»:
Թրամփի խօսքով՝ Ուքրանիոյ մէջ պատերազմը կրնայ աւարտիլ քանի մը շաբթուան ընթացքին: Ան նորէն կրկնած է, որ պատերազմը չէր սկսիր, եթէ ինքը նախագահ ըլլար:
Անդրադառնալով Փութինի մտադրութիւններուն՝ ԱՄՆ նախագահը նորէն պնդած է, որ ինքն իսկապէս կը հաւատայ՝ «Ռուսիոյ նախագահը կ՚ուզէ համաձայնութեան գալ»։
«Իմ ամբողջ կեանքը գործարքներ են», –աւելցուցած է ԱՄՆ նախագահը: Անոր խօսքով, կողմերը «ճիշդ հիմա» կ՚աշխատին խաղաղութեան հասնելու ուղղութեամբ, եւ թէեւ ան կը գերադասէր անմիջապէս հասնիլ խաղաղութեան վերջնական համաձայնագրի, բայց կրակի դադրեցումը կրնայ աւելի արագ տեղի ունենալ:
Ֆրանսայի նախագահն իր հերթին յայտնած է, որ Ուքրանիոյ եւ Ռուսիոյ միջեւ զինադադարը կրնայ համաձայնեցուիլ յառաջիկայ շաբաթներու ընթացքին:
Ըստ միջազգային գործակալութիւններու՝ Ֆրանսայի առաջնորդն ըսած է, որ Թրամփի վերադարձը Սպիտակ տուն երկրորդ ժամկէտով «խաղի կանոններու փոփոխութիւն է»: Մաքրոնը շեշտած է անվտանգութեան երաշխիքներու անհրաժեշտութիւնը եւ նշած է, որ որեւէ համաձայնագիր պէտք է «ստուգուի եւ հաստատուի»: Մաքրոնը պատմած է Փութինի հետ իր զրոյցներու մասին՝ նշելով, որ Ռուսիոյ առաջնորդի հետ խօսիլն արժէքաւոր է, սակայն միայն ուժի դիրքէ:
Ֆրանսայի նախագահը աւելցուցած է, որ Փութինի կողմէ խաղաղութեան համաձայնագրի պահպանման միակ երաշխիքը «ուժեղ ըլլալն է» եւ «զսպման ներուժ ունենալը»:
