-7.91c
Երեվան
կրկ, փտր 23
Սիրիայում տասնչորս տարվա հակամարտության պատճառով տասնամյակներ կպահանջվեն տնտեսական, սոցիալական և զարգացման առաջընթաց գրանցելու համար: «Արմենպրես»-ի փոխանցմամբ՝ այս մասին նշվում է ՄԱԿ-ի Զարգացման ծրագրի (ՄԱԶԾ) զեկույցում։
Փաստաթղթի համաձայն՝ այսօր 10 սիրիացիներից ինը ապրում է աղքատության մեջ, իսկ յուրաքանչյուր չորրորդն անգործ է:
Զեկույցը նախազգուշացնում է, որ աճի ներկայիս տեմպերով տնտեսությունը չի վերականգնի ՀՆԱ-ի մինչկոնֆլիկտային մակարդակը մինչև 2080 թվականը (կամ առաջիկա 55 տարվա ընթացքում):
2010 թվականին Սիրիայի ՀՆԱ-ն կազմել է 62 միլիարդ դոլար, սակայն կրճատվել է ավելի քան կիսով չափ։ 2011-2024 թվականների ընթացքում կորցրած ՀՆԱ-ի գնահատված կորուստը կազմում է մոտ 800 միլիարդ ԱՄՆ դոլար:
Վերջին հինգ տարիների ընթացքում ՀՆԱ-ի միջին աճը կազմել է տարեկան 1,3 տոկոս։
«Եթե այսպես շարունակվի, ապա 55 տարի կպահանջվի ՀՆԱ-ի մինչկոնֆլիկտային մակարդակը վերականգնելու համար», - նշված է զեկույցում:
Ավելի քան 7,2 միլիոն մարդ տեղահանված է Սիրիայի ներսում, ևս 6 միլիոն մարդ ապրում է արտասահմանում որպես փախստական: Բոլորը միասին կազմում են բնակչության կեսից ավելին։
Գրանցվել է աղքատության ահռելի աճ․ մինչ հակամարտությունը աղքատությունը կազմել է 33 տոկոս, իսկ այժմ այն եռապատկվել է՝ հասնելով մինչև 90 տոկոսի: Ծայրահեղ աղքատությունը 11 տոկոսից հասել է 66 տոկոսի:
«Բացի անհապաղ մարդասիրական օգնությունից, Սիրիայի վերականգնման համար անհրաժեշտ են երկարաժամկետ ներդրումներ՝ ժողովրդի համար տնտեսական և սոցիալական կայունություն ստեղծելու համար», - ասել է ՄԱԶԾ ադմինիստրատոր Ախիմ Շտայները:
«2010-ին 5,5 միլիոն տներից 328 000-ն ամբողջությամբ ավերվել է, յուրաքանչյուր երեք տներից մեկն ավերվել կամ վնասվել է, ինչը նշանակում է, որ մենք ունենք 5,7 միլիոն մարդ, որոնք ապաստանով աջակցության կարիք ունեն», - տեղեկացրել է ՄԱԶԾ-ի ադմինիստրատորի օգնական և Արաբական երկրների տարածաշրջանային բյուրոյի տնօրեն Աբդալլահ ալ-Դարդարին:
Համաձայն ՄԱԶԾ-ի՝ առաջընթացի ճանապարհը պահանջում է համապարփակ ռազմավարություն՝ ուղղված կառավարման բարեփոխումներին, տնտեսական կայունացմանը, ենթակառուցվածքների վերակառուցմանը և սոցիալական ծառայությունների ուժեղացմանը:
Սիրիայում պատերազմը բռնկվել է 2011 թվականի մարտին նախագահ Բաշար ալ-Ասադի դեմ բողոքի ցույցերից հետո։ 2024 թվականի դեկտեմբերին ալ-Ասադը հեռացել է իշխանությունից:
ՄԱԶԾ-ի տվյալներով՝ պատերազմը խլել է մոտ 618 000 կյանք՝ դառնալով նորագույն պատմության ամենամահաբեր հակամարտություններից մեկը: Մինչ այժմ մոտ 113 000 մարդու ճակատագիրն անհայտ է մնացել։
