12.09c
Երեվան
չրք, փտր 25
Չաւուշօղլուն ԱՄՆ պետքարտուղար Էնթընի Պլինքընին ըսած է, որ Անգարայի կողմէ ռուսական С-400 հակաօդային պաշտպանութեան համակարգերու ձեռքբերման հարցը փակ է:
«Մենք նորէն յիշեցուցած ենք անոր, թէ ինչու Թուրքիան Ռուսաստանէն գնած է С-400-ները: Համալիրները գնուած են, եւ այժմ հարցը փակուած է», - ըսած է Չաւուշօղլուն թուրք լրագրողներուն Պրիւքսէլի մէջ:
2019-ի յուլիսի կէսերուն մեկնարկած են ռուսական նորագոյն С-400 հակաօդային պաշտպանութեան համակարգերու մատակարարումները, որոնք «ճգնաժամի» պատճառ դարձած են ԱՄՆ-ի հետ Թուրքիոյ յարաբերութիւններուն մէջ:
Ուաշինկթընը պահանջած է հրաժարիլ գործարքէն եւ ատոր դիմաց գնել ամերիկեան Patriot համակարգեր՝ սպառնալով յետաձգել կամ նոյնիսկ չեղեալ յայտարարել վերջին «Ֆ-35» կործանիչներու վաճառքը Թուրքիոյ, ինչպէս նաեւ պատժամիջոցներ կիրառել՝ համաձայն CAATSA-ի (պատժամիջոցներու միջոցով ԱՄՆ հակառակորդներուն հակազդելու մասին օրէնք,-խմբ.):
Անգարան հրաժարած է զիջումներու երթալէ եւ շարունակած է բանակցութիւնները С-400-ներու լրացուցիչ խմբաքանակի շուրջ:
