23.73c
Երեվան
երք, օգս 04
Լիբանանի Պետական Համալսարանի Իրաւաբանական, Քաղաքական եւ Վարչական Գիտութիւններու Ֆակուլտետին մէջ տեղի ունեցած մագիստրոսական աւարտաճառերու պաշտպանութիւնը յատկանշուեցաւ ոչ միայն երկու եղբայր օդաչուներու բացառիկ ակադեմական յաջողութեամբ, այլեւ բարձր մակարդակի մասնակցութեամբ։ Միջոցառման ներկայ էր եւ աւարտաճառներուն հսկողութիւնը կատարած էր Լիբանանի Երիտասարդութեան եւ Մարմնամարզի նախարար դոկտ. Նորա Պայրագտարեան, որ իր գնահատանքը յայտնեց ներկայացուած ուսումնասիրութիւններուն գիտական արժէքին։ Ստորեւ կը ներկայացնենք անոր գրառումը՝ այս յիշատակելի օրուան առիթով։
«Ինծի համար մեծ պատիւ էր նախագահել եւ ղեկավարել Լիբանանի Պետական Համալսարանի Իրաւաբանական, Քաղաքական եւ Վարչական Գիտութիւններու Ֆակուլտետին մէջ տեղի ունեցած մագիստրոսական աւարտաճառերու պաշտպանութիւնները, որոնք յաջողութեամբ կատարեցին Լիբանանի Զինուած Ուժերու երկու ականաւոր օդաչու եղբայրներ։ Գնդապետ Ռաուատ Մսալլեմ պաշտպանեց իր ուսումնասիրութիւնը՝ «Թեքնոլոժիական դարաշրջանին տիեզերական անվտանգութեան կառավարման համակարգը», իսկ գնդապետ Սաատ Մսալլեմ ներկայացուց «Օդաչուի ղեկէն անդին. արհեստական բանականութեամբ ղեկավարվող անօդաչու թռչող սարքերու ազդեցութիւնը անվտանգութեան վրայ» խորագիրը կրող իր աւարտաճառը։ Սրտանց կը շնորհաւորեմ զոյգ եղբայրները, որոնք արժանացան մագիստրոսի աստիճանին՝ «Շատ լաւ» գնահատականով։ Քննող յանձնախումբերը նաեւ բարձր գնահատեցին երկու ուսումնասիրութիւններուն գիտական արժէքն ու ակադեմական բարձր մակարդակը։ Երկու եղբայրներու՝ նոյն օրը այս կարեւոր ակադեմական հանգրուանին հասնիլը բացառիկ ձեռքբերում մըն է եւ արդար հպարտութեան պատճառ։ Անոնց կը մաղթեմ շարունակական յաջողութիւն թէ՛ զինուորական ծառայութեան, թէ՛ ակադեմական ասպարէզին մէջ, վստահ ըլլալով, որ պիտի շարունակեն ծառայել Լիբանանին նոյն նուիրումով, արհեստավարժութեամբ եւ գիտելիքի անսպառ ձգտումով»։
