32.09c
Երեվան
շբթ, օգս 15
Կլենտէյլի ոստիկանութիւնը ձերբակալած է հինգ հայեր՝ փոստային առաքանիներու գողութեան, անձնական տուեալներու իւրացման եւ վարկային քարտերու հետ կապուած խարդախութեան գործով։ Այս մասին օգոստոս 13-ին յայտնած է Կլենտէյլի ոստիկանութեան վարչութիւնը։
Ոստիկանութեան տուեալներով՝ հետաքննութիւնը սկսած է այն բանէ ետք, երբ տեղեկութիւններ ստացուած են, թէ անյայտ անձեր մուտք կը գործեն բազմաբնակարան շէնքի բնակիչներու փոստարկղերը եւ անկէ կը վերցնեն նամակներն ու այլ առաքանիները։ Դէպքը տեղի ունեցած է West Colorado Street-ի 500-րդ թաղամասին մէջ։
Քննութեան ընթացքին պարզուած է, որ կասկածեալները, օգտագործելով այլ անձերու ինքնութիւնը հաստատող տուեալներ, անոնց անունով խարդախութեամբ վարկային քարտեր ձեւակերպած են, որոնք այնուհետեւ ուղարկուած են նոյն բնակելի համալիրի հասցէներուն։ Ոստիկանութիւնը նաեւ յայտնած է, որ փոստարկղերու փականները փոխուած եւ փոխարինուած են կեղծ փականներով՝ անոնց անօրինական մուտք ապահովելու համար։
Օգոստոս 13-ին ոստիկանութիւնը բնակելի համալիրին մէջ շարք մը խուզարկութիւններ իրականացուցած է եւ ձերբակալած Կլենտէյլի հինգ բնակիչներ՝ 36-ամեայ Ռազմիկ Բարսեղեանը, 27-ամեայ Ռոպերթ Պօղոսեանը, 35-ամեայ Վահան Քալաշեանը, 26-ամեայ Արմէն Յարութիւնեանը եւ 27-ամեայ Արտեոմ Միլիտոնեանը։ Անոնք կը կասկածուին խարդախութեան, անձնական տուեալներու իւրացման եւ գողութեան հետ կապուած յանցագործութիւններու մէջ։
Խուզարկութիւններու ընթացքին յայտնաբերուած են այլ անձերու պատկանող մեծ քանակութեամբ անձնական տուեալներ, վարկային քարտերու վերաքոտաւորման սարքեր, բազմաթիւ վարկային քարտեր, կանխիկ դրամ եւ ոսկի։ Հետաքննութիւնը կը շարունակուի, իսկ ոստիկանութիւնը կը փորձէ պարզել հնարաւոր լրացուցիչ տուժածներու շրջանակը։ Գործը նախատեսուած է ներկայացնել Լոս Անճելըսի շրջանի դատախազութիւն՝ մեղադրանք առաջադրելու հարցը քննարկելու համար։
