32.09c
Երեվան
երկ, հնս 02
Կազայի հատուածի տարբեր շրջաններու վրայ Իսրայէլի օդային ու հրետանային հարուածներու հետեւանքով մայիս 30-ի լուսաբացէն ի վեր սպաննուած է 13 պաղեստինցի, այսպիսով, վերջին 24 ժամերուն զոհերու թիւը անցած է 70-ը։ «Արմէնփրէս»-ի հաղորդմամբ՝ այս մասին կը յայտնէ պաղեստինեան WAFA գործակալութիւնը։
Իսրայէլի թիրախ դարձած են Կազայի հիւսիսը գտնուող Ճապալիա ալ-Նազլա բնակավայրը, ինչպէս նաեւ Խան Եունիս ու Ռաֆահ քաղաքները։
Արեւմտեան ափի շարք մը քաղաքներու եւ գիւղերու մէջ իսրայէլեան ուժերը ձերբակալութիւններ կը կատարեն։
Միւս կողմէ, Իսրայէլը նոր տարհանման հրաման արձակած է Հիւսիսային Կազայի Ճապալիա ալ-Պալատ եւ ալ-Աթաթրա շրջաններու, ինչպէս նաեւ Կազա քաղաքի Շուճայեա, ալ-Տարաճ եւ ալ-Զէյթուն թաղամասերու համար։
Տեղեկութիւններուն համաձայն՝ Կազայի շրջանի շուրջ 2,4 միլիոն բնակչութենէն մօտ 1,5 միլիոնը անօթեւան դարձած է պատերազմի ընթացքին իրենց տուները կորսնցնելու հետեւանքով։
Իր հերթին, Իսրայէլի ազգային անվտանգութեան նախարար Իթամար Պէն-Կվիրը յայտարարած է, թէ անհրաժեշտ է ներխուժել Կազա եւ ոչնչացնել «Համաս»-ը։
«Ժամանակն է ամբողջ ուժով մուտք գործել Կազա՝ «Համաս»-ը ոչնչացնելու եւ պարտութեան մատնելու համար»,– ըսած է ան։
2023 թուականի հոկտեմբեր 7-էն սկսեաք ռազմական գործողութիւններուն հետեւանքով Կազայի շրջանին մէջ զոհերու թիւը հասած է 54.249-ի, վիրաւորուած է 123.492 մարդ։
Իսրայէլը Կազայի շրջանին մէջ ռազմական գործողութիւններ սկսած էր ի պատասխան պաղեստինեան «Համաս» շարժման զինեալներու ներխուժումին, որուն հետեւանքով զոհուած էր մօտ 1.200 մարդ, իսկ շուրջ 250 հոգի գերեվարուած էր։
