10.09c
Երեվան
շբթ, մրտ 14
Իրանի իշխանութիւնները սպառնացած են Միացեալ Նահանգներուն, որ եթէ երկրի նաւթային եւ այլ ուժանիւթային ենթակառուցուածքներուն դէմ յարձակումներ սկսին, տարածաշրջանին մէջ ԱՄՆ-ի հետ համագործակցող նաւթային ընկերութիւններու կառոյցները պիտի ոչնչացուին։ Իսլամական Հանրապետութեան ղեկավարութեան ներկայացուցիչը մարտ 14-ին այս մասին յայտարարութիւն ըրած է Press TV պետական անգլերէնալեզու հեռուստակայանի եթերին։
Թեհրանի այս մեկնաբանութիւնը հնչած է այն բանէ ետք, երբ ԱՄՆ նախագահ Տանըլտ Թրամփ յայտարարած էր, որ «Մերձաւոր Արեւելքի պատմութեան մէջ ամենահզօր ռմբակոծութեան» հետեւանքով Խարկ կղզիին վրայ գտնուող «բոլոր ռազմական թիրախները» ոչնչացուած են։ Այդ կղզիին վրայ կը գտնուին այն թերմինալները, որոնցմով կ՚անցնի Իրանէն արտահանուող նաւթի 90 առ հարիւրը։
Նաեւ իրանական Fars պետական լրատուական գործակալութիւնը նախազգուշացում տարածած է, որու մէջ նշուած է, որ ուժանիւթի ոլորտին դէմ ամերիկեան հարուածները պիտի յանգեցնեն «տարածաշրջանային նաւթակազային այն բոլոր ենթակառուցուածքներու ոչնչացման, որոնցով Միացեալ Նահանգները եւ անոր դաշնակիցները շահագրգռուած են»։
Թրամփ նաեւ ըսած է, որ որոշած է «չոչնչացնել» Խարկ կղզիի նաւթային կառոյցները, սակայն կրնայ վերանայիլ իր որոշումը, եթէ Իրան խոչընդոտէ Հորմուզի նեղուցով նաւարկութեան։
