4.09c
Երեվան
շբթ, փտր 28
Հայաստանի վարչապետ Նիկոլ Փաշինեան եւ Ատրպէյճանի նախագահ Իլհամ Ալիեւ կրնան հանդիպիլ Ռուսիոյ մէջ եւ եռակողմ բանակցութիւններ վարել Ռուսիոյ Դաշնութեան նախագահ Վլատիմիր Փութինի մասնակցութեամբ։ Հանդիպման մասին յայտնած է «Վետոմոսթի» պարբերականի դիւանագիտական աղբիւրը։
Անոր խօսքով, աշխատանքը սկսած է 14 հոկտեմբերին Աստանայի մէջ Անկախ Պետութիւններու Համագործակցութեան գագաթնաժողովին՝ Փութինի հաշտարար ելոյթէն ետք. այնտեղ քննարկուած էին Հայաստանի եւ Ատրպէյճանի միջեւ տարածքային վէճերը։
«Վետոմոսթի»-ի մէկ այլ աղբիւր նշած է, որ նման բանակցութիւնները կրնան տեղի ունենալ հոկտեմբերի վերջին օրերուն, հանդիպման կայացման հիմնական վայրեր կրնան ըլլալ Մոսկուան կամ Սոչի։
«Ամենայն հաւանականութեամբ, ընտրութիւնը պիտի կանգնի Սոչիի վրայ»,-ըսած է ան։
Աւելի վաղ Փաշինեանի եւ Ալիեւի երկու հանդիպում՝ մէկը Թուրքիոյ նախագահ Ռեճէպ Թայէպ Էրտողանի, միւսը՝ Ֆրանսայի նախագահ Էմանուէլ Մաքրոնի մասնակցութեամբ, տեղի ունեցած է Փրակի մէջ 6-7 հոկտեմբերին, Եւրոպական քաղաքական համայնքի գագաթնաժողովին։ Մաքրոնի մասնակցութեամբ գագաթնաժողովը, որուն մասնակցած է նաեւ Եւրոպական խորհուրդի նախագահ Շարլ Միշելը, աւարտած է յայտարարութեան ընդունմամբ։ Անոր մէջ Հայաստանն ու Ատրպէյճանը հաստատած են իրար տարածքային ամբողջականութեան ճանաչումը:
