14.09c
Երեվան
շբթ, մյս 16
Numbeo հետազօտական փորթալի կողմէ հրապարակուած է աշխարհի երկիրներու անվտանգութեան վարկանիշային աղիւսակը, համաձայն որուն՝ 2024-ին Հայաստանը զբաղեցուցած է 7-րդ հորիզոնականը՝ 78.4 միաւորով: Նախորդ տարուան համեմատ դիրքային փոփոխութիւն չէ արձանագրուած, սակայն արձանագրուած է 0.4 միաւորով բարելաւում:
2024-ին անվտանգութեան վարկանիշային աղիւսակին մէջ ներառուած են ընդհանուր առմամբ 146 երկիր: Առաջատար եռեակին մէջ են Անտորրան (87.1 միաւոր), ԱՄԷ-ն (84.2 միաւոր) եւ Քաթարը (84 միաւոր):
Նկատենք, որ Հայաստանը անվտանգութեան վարկանիշային աղիւսակին մէջ առաջատար հորիզոնականին վրայ է ինչպէս տարածաշրջանի, այնպէս ալ ԵԱՏՄ երկիրներու շարքին։
Տարածաշրջանի երկիրներէն Վրաստանը 19-րդ հորիզոնականին վրայ է՝ 73.9 միաւորով, որուն կը յաջորդեն Ատրպէյճանը՝ 33-րդ հորիզոնական՝ 68.5 միաւորով, այնուհետեւ Թուրքիան՝ 53-րդ հորիզոնական՝ 59.1 միաւորով։ Տարածաշրջանի երկիրներու շարքին ամենացած՝ 90-րդ հորիզոնականը, զբաղեցուցած է Իրանը՝ 50.5 միաւորով։
ԵԱՏՄ երկիրներէն Ռուսաստանը 51-րդն է (60.8 միաւոր), որուն կը յաջորդեն Ղազախստանը՝ 72-րդ (54.1 միաւոր), այնուհետեւ Պելառուսիան՝ 94-րդ (49 միաւոր) եւ Ղրղզիստանը 106-րդ (46.1 միաւոր) հորիզոնական։
Numbeo հետազօտական փորթալի կողմէ հրապարակուած է նաեւ 2024-ին քաղաքներու անվտանգութեան վարկանիշային աղիւսակը, որուն մէջ Երեւանը զբաղեցուցած է 11-րդ հորիզոնականը՝ 78.2 միաւորով: Նշենք, որ 2023-ին աղիւսակին մէջ Երեւանը 14-րդ հորիզոնականին վրայ էր՝ 78.1 միաւորով: 2024-ին նախորդ տարուան համեմատ արձանագրուած է ինչպէս հորիզոնականի, այնպէս ալ միաւորներու բարելաւում:
Ըստ քաղաքներու անվտանգութեան ցուցանիշի՝ Հայաստանը (Երեւան) եւս առաջատար է ինչպէս տարածաշրջանի, այնպէս ալ ԵԱՏՄ երկիրներու շարքին:
