15.09c
Երեվան
ուրբ, ապր 25
Հայաստանի Հանրապետութեան եւ Ռուսիոյ Դաշնութեան միջեւ դիւանագիտական յարաբերութիւններու հաստատման 33-ամեակի կապակցութեամբ՝ Հայաստանի եւ Ռուսիոյ ԱԳ նախարարներ Արարատ Միրզոյեանը եւ Սերկէյ Լաւրովը փոխանակուած են ուղերձներով:
Ստորեւ կը ներկայացնենք Ռուսիոյ արտաքին գործոց նախարար Սերկէյ Լաւրովի ուղերձը.
«Յարգելի՛ Արարատ Սամուէլովի,
Ընդունեցէք անկեղծ շնորհաւորանքներ Ռուսիոյ Դաշնութեան եւ Հայաստանի Հանրապետութեան միջեւ դիւանագիտական յարաբերութիւններու հաստատման 33-րդ տարեդարձի կապակցութեամբ։
Այս իրադարձութիւնը նշանաւորած է Մոսկուայի եւ Երեւանի երկկողմ յարաբերութիւններու ժամանակակից փուլի սկիզբը։ Հիմնուելով հոգեւոր եւ բարոյական արժէքներու ընդհանրութեան, միջոլորտային եւ մարդասիրական շփումներու աւանդական ամրութեան վրայ՝ Ռուսիան եւ Հայաստանը մշակած են ամուր իրաւական դաշտ եւ կառուցած բազմակողմ, հաւասար, փոխշահաւէտ յարաբերութիւններ։
Հակառակ ռուս-հայկական դաշինքը խարխլելու արտաքին փորձերուն՝ մենք կը յաջողինք պահպանել քաղաքական երկխօսութեան եւ արտաքին քաղաքականութեան համակարգման բարձր մակարդակ եւ մեծցնել առեւտրատնտեսական համագործակցութիւնը ինչպէս երկկողմ, այնպէս ալ միասնական համարկային տարածութեան ձեւաչափով։ Մենք պատրաստ ենք շարունակելու համատեղ աշխատանքը՝ աւելի խորացնելու եւ բարելաւելու գործընկերութեան արդիւնաւէտութիւնը՝ ի շահ մեր երկիրներու քաղաքացիներու, ի շահ Հարաւային Կովկասի մէջ խաղաղութեան եւ անվտանգութեան ամրապնդման»։
Ձեզի եւ Հայաստանի արտաքին գործոց նախարարութեան բոլոր աշխատակիցներուն կը մաղթեմ քաջառողջութիւն, բարօրութիւն եւ յաջողութիւններ մասնագիտական գործունէութեան մէջ, իսկ եղբայրական հայ ժողովուրդին՝ բարգաւաճում։
