-4.91c
Երեվան
կրկ, փտր 23
Լիբանանի «Գասպար Իփէկյան» հայկական թատերախումբը երկու տարի է՝ համագործակցում է Գյումրու Վարդան Աճեմյանի անվան դրամատիկական թատրոնի հետ: Այդ համագործակցության արդյունքում այս տարի թատրոնի ռեժիսոր Հակոբ Տեր-Ղուկասյանը բեմադրություն է արել Գյումրու թատրոնում՝ աշխատելով տեղի դերասանների հետ։
Վարդան Աճեմյանի անվան դրամատիկական թատրոնի դերասանների մասնակցությամբ Գյումրիում նա բեմադրել էր մեկ տարի առաջ կյանքից հեռացած լիբանանահայ գրող-թատերագիր, հրապարակախոս Արա Արծրունու «Բարի լոյս, պարոն Մատթէոս» ստեղծագործությունը, որի ներկայացումները` «Մհեր Մկրտչյան» փոքր բեմում, սպասված թատերական իրադարձություն էին գյումրեցի հանդիսատեսի եւ Բեյրութից ժամանակ հյուրերի համար:
Արա Արծրունին իր այս ստեղծագործությունը գրել է աբսուրդի եւ այլաբանության ժանրում. ժանրը հոգեհարազատ էր գրողին՝ նա իր ստեղծագործությունների մի մասը գրել է հենց այս ժանրով՝ ցույց տալով կյանքի եւ իրադարձությունների բոլորովին այլ կողմերը: Երեք գործող անձով գրված ստեղծագործությունը հայ ժամանակակից դրամատուրգիայի գլուխգործոց է:
Բեմադրիչ Հակոբ Տեր-Ղուկասյանը մտերիմ է եղել Արա Արծրունու հետ, նա ասում է, որ մահից առաջ գրողի ցանկություններից է եղել, որ «Բարի լոյս, պարոն Մատթէոս»-ը բեմադրվի: Մահից մեկ տարի հետո արված այս բեմադրությունը նաեւ լիբանանահայ արվեստագետի հիշատակի ոգեկոչումն է:
Բեմադրությունը շուտով կներկայացվի նաեւ Բեյրութում:
Արա Արծրունի (1932-2018)
Գյումրու պետական թատրոնի բեմում հնչել է արեւմտահայերեն, հանդիսատեսը ծանոթացել է նաեւ լիբանանահայ տաղանդավոր դրամատուրգ Արա Արծրունու ստեղծագործությանն ու ժամանակակից բեմադրիչ Հակոբ Տեր-Ղուկասյանի թատերական ձեռագրին:
Լիբանանահայ բեմադրիչ Հակոբ Տեր-Ղուկասյանը
(Հատված ներկայացումից)
Դերերում՝ գյումրեցի դերասաններ Հովհաննես Հովհաննիսյան (պարոն Մատթեոս), Արսեն Սաղաթելյան (Ջորջ), Ջեմմա Ադամյան (Սառա) :
Տեսանյութը՝ լրագրող Երանուհի Սողոյանի
