31.09c
Երեվան
ուրբ, օգս 01
«Արեւելք»ին նամակ գրած Գոհար Գալուստեան եւ իր ընտանիքի անդամները յառաջիկայ օրերուն Երեւան պիտի ժամանեն: Նշենք, որ Գալուստեան, որուն Հալէպի «Զուարթնոց» եկեղեցւոյ մօտ գտնուող բնակարանը անցնող օրերուն հրթիարձակումներու ենթարկուելով ծանր վնասներու ենթարկուած էր, նամակ մը գրելով խնդրած էր նախնական օգնութիւն ստանալ Հայսատան հասնելէ ետք: Տեղին կը համարենք յիշեցնել, որ Գալուստեաններու՝ Հայաստան գալու տոմսերը ապահոված է «Հալէպ» հայրենասիրական բարեգործական հասարակական կազմակերպութիւնը, ինչպէս նաեւ այս օրերուն կարգադրութիւններ կը տեսնուին անոնց համար բնակարան մը ապահովելու իմաստով: Գալուստեան «Արեւելք»ին խօսելով ըսած էր, թէ իր երկու զաւակները մնացած են փուլ եկած առաստաղի սալիկներուն տակ, եւ անոնք փրկուած էին հրաշքով: Գոհարի ամուսինը նոյնպէս վիրաւորուած էր: Հայուհին «Արեւելք»ի ամպիոնէն կոչ ըրած էր օգնել բոլոր այն հայորդիներուն, որոնք վճռած են Հալէպէն դուրս գալ: Ան բառացիօրէն ըսած է. «Մենք շատ բաներէ անցանք եւ վեց տարիէ ի վեր կը տառապինք Հալէպի մէջ: Տուն տեղ ունէինք եւ փլատակ դարձաւ եւ ատկէ ետք մեր վիճակն այսօր անտանելի է ու ատոր համար ալ որոշեցինք դուրս գալ եւ հայրենիք վերադառնալ: Ես կը կարծեմ, որ ամբողջ հալէպահայութիւնը դուրս պէտք է գայ այս քաղաքէն» ըսած է Գոհար Գալուստեան:
