11.09c
Երեվան
շբթ, մյս 16
Մայր Աթոռ Սուրբ Էջմիածնից Գիտելիքի, գրի եւ դպրութեան օրուայ առիթով Հայրապետական Մեր օրհնութիւնն ենք բերում կրթական գործի կազմակերպիչներին, մանկավարժներին, աշակերտ եւ ուսանող Մեր զաւակներին։
Սիրելիներ, նոր ուսումնական տարեշրջանը բերում է ապագայի նոր յոյսեր ու ծրագրեր եւ հաւատ, որ այսօր սերմանուած գիտելիքներն ու արժէքները վաղը պիտի արգասաւորուեն որպէս բարի արդիւնքներ։ Այս տեսլականով են վերստին բացւում մեր կրթական հաստատութիւնների դռները։
Մեր ժողովուրդն իր պատմութեան ամենադժնդակ ժամանակներում անգամ բարձր է դասել ուսումն ու կրթութիւնը, որոնք առաւել կարեւորւում են գիտական ձեռքբերումների մեր դարում: Այսօր, երբ մեր երկիրը կանգնած է մեծ մարտահրաւէրների առջեւ, մեր ժողովուրդը տագնապալի օրեր է ապրում, կրթութեան արժէքն իմացող մեր նախնեաց ոգով ու դժուարութիւնները յաղթահարելու նախանձախնդրութեամբ ամէն ջանք պիտի ներդրուի ուսումնական գործընթացը լաւագոյնս իրականացնելու համար, որպէսզի ազգիս իւրաքանչիւր զաւակ իր գիտելիքներով, հայրենասէր ոգով ու ձգտումներով դառնայ ուժն ու զօրութիւնը մեր հայրենիքի եւ մեր ապահով գալիքի կերտման։
Աստծոյ առատ շնորհներն ենք հայցում այսօր կրթօջախներ մուտք գործող մեր սիրեցեալ զաւակներիդ, մաղթում մտքի ու հոգու կորով, անդուլ ջանասիրութիւն։ Գիտցէք, որ ուսման մէջ ձեր ձեռքբերումները յաղթանակներ են, որոնք պիտի ծառայեցնէք ձեր անձնական կեանքի, ձեր ընտանիքների եւ մեր երկրի ու ժողովրդի առաջընթացին։ Սուրբ Գիրքը պատգամում է. «Մի՛ թող իմաստութիւնը, եւ նա կը պաշտպանի քեզ, սիրիր այն, եւ նա կը պահպանի քեզ» (Առակաց Դ 6)։
Բարձրեալի զօրակցութիւնն ենք հայցում մանկավարժներին եւ կրթութեան գործի կազմակերպիչներին, մաղթում արգասաւոր ուսումնական տարի։ Թող Աստուած օրհնի մեր հայրենիքը, մեր ժողովրդի կեանքը եւ կրթութեան մշակների շնորհընկալ առաքելութիւնը՝ ի պայծառութիւն եւ ի փառս ազգիս։
