23.09c
Երեվան
չրք, օգս 19
Հայկական արմատներով միջազգային հաղորդակցութեան եւ նորաձեւութեան ոլորտի փորձառու մասնագէտ Ժասմին Սեւան օրերս նշանակուած է աշխարհահռչակ Skims ապրանքանիշի հաղորդակցութեան փոխնախագահ։ Քիմ Քարտաշեանի եւ Եենս Կրէտի համահիմնած այս արագօրէն ընդլայնուող ապրանքանիշին մէջ ստանձնած նոր պաշտօնը կարեւոր նոր հանգրուան մըն է Ժասմին Սեւանի միջազգային մասնագիտական ուղիին մէջ։
Ժասմին Սեւանը բնիկ կիպրահայ, երկարամեայ դիւանագէտ եւ ՄԱԿ-ի մէջ բազմաթիւ պատասխանատու առաքելութիւններ իրականացուցած Տիար Պենոն Սեւանի դուստրն է։ Իր հօր դիւանագիտական ժառանգութեան արժանաւոր շարունակողը ըլլալով՝ Ժասմին այսօր իր մասնագիտական կարողութիւններով կը հաստատէ իր ուրոյն տեղը միջազգային ասպարէզին մէջ։
Այս նշանակումը մեծ ուրախութեամբ եւ հպարտութեամբ կ՚ողջունենք ու մեր սրտագին խնդակցութիւնները կը յղենք Ժասմին Սեւանին՝ մաղթելով նորանոր վերելքներ, յաջողութիւններ եւ միջազգային նոր փայլուն ձեռքբերումներ։
Ստորեւ՝ Ժասմին Սեւանի Skims-ի մէջ կարեւոր պաշտօնի նշանակման մասին հրապարակուած ծաւալուն եւ մանրամասն հաղորդագրութիւնը՝
ԺասմինՍեւան՝ Skims-ի հաղորդակցութեան նոր փոխնախագահ
Քիմ Քարտաշեանի եւ Եենս Կրէտի համահիմնադրած՝ լուծումներու վրայ կեդրոնացած նորաձեւութեան ապրանքանիշը՝ Skims, ԺասմինՍեւանը նշանակած է հաղորդակցութեան փոխնախագահ։
Skims-ի հաղորդագրութեան համաձայն՝ Սեւան պիտի մասնակցի ապրանքանիշի համաշխարհային հաղորդակցութեան ռազմավարութեան ղեկավարման աշխատանքներուն՝ նպատակ ունենալով ամրապնդել ընկերութեան դիրքը «նորաձեւութեան, մշակոյթի եւ նորարարութեան խաչմերուկին» վրայ, մինչ ընկերութիւնը կը շարունակէ ընդլայնել իր միջազգային ներկայութիւնը։ Ան պիտի զեկուցէ Թրէյսի Նկույենին, որ անցեալ ամիս նշանակուած էր հաղորդակցութեան գլխաւոր պատասխանատու։
Սեւան Skims-ին կը միանայ համաշխարհային շքեղ նորաձեւութեան ապրանքանիշերու հետ մօտ երկու տասնամեակի փորձառութեամբ։ Վերջին պաշտօնը ստանձնած էր Վիքթորիա Պեքհեմի ապրանքանիշին մէջ՝ որպէս համաշխարհային հաղորդակցութեան եւ ապրանքանիշերու գործընկերութիւններու տնօրէն։ Այդ շրջանին ան ղեկավարած էր ապրանքանիշի հաղորդակցութեան ռազմավարութիւնը՝ անոր նշանակալի աճի փուլին ընթացքին։
Իր պաշտօնավարութեան ընթացքին Սեւան վերահսկած էր Վիքթորիա Պեքհեմի առաջին մասնակցութիւնը Փարիզի Նորաձեւութեան Շաբաթուան պաշտօնական օրացոյցին, ապահոված էր ռազմավարական գործընկերութիւններ Breitling, Mango եւ Gap ընկերութիւններուն հետ, ինչպէս նաեւ կարեւոր դեր ունեցած էր Netflix-ի բարձր գնահատանքի արժանացած «Victoria Beckham» վաւերագրական ֆիլմի պատրաստութեան եւ համաշխարհային ներկայացման մէջ։
Վիքթորիա Պեքհեմէն առաջ Սեւան հաղորդակցութեան տնօրէնն էր Christopher Kane-ի մէջ, իսկ աւելի առաջ՝ հանրային յարաբերութիւններու տնօրէնը՝ Karla Otto ընկերութեան մէջ։
Skims-ի հաղորդակցութեան գլխաւոր պատասխանատու Թրէյսի Նկույենը, անդրադառնալով նշանակման, ըսաւ. «Ժասմինը հաղորդակցութեան բացառիկ ղեկավար մըն է՝ սուր ռազմավարական մտածողութեամբ եւ ապրանքանիշերու՝ մշակոյթ ձեւաւորելու կարողութեան խոր ըմբռնումով»։
Ան աւելցուցած է, որ Սեւանի փորձառութիւնը՝ նորաձեւութեան ամենէն յարգուած ապրանքանիշերուն համար հեղինակութիւն կերտելու գործին մէջ, ինչպէս նաեւ անոր կապերը լրատուամիջոցներու, նորաձեւութեան եւ ժամանցի ոլորտներուն մէջ, զինք կը դարձնեն Skims-ի թիմին «անհաւատալի արժէքաւոր համալրում»։
Ժասմին Սեւան ծնած է Նիւ Եորք եւ վերջին 20 տարիներուն ապրած է Լոնտոնի մէջ։ Իր նոր պաշտօնին համար ան պիտի տեղափոխուի Լոս Անճելըս։
Սեւան իր կարգին ըսաւ, որ «անհամբերութեամբ կը սպասէ Skims-ին միանալու՝ ապրանքանիշի ճանապարհորդութեան այս հուզիչ հանգրուանին։Skims-ը կառուցած է աշխարհի ամենաազդեցիկ եւ մշակութային առումով ամենաարդիական ապրանքանիշերէն մէկը, եւ պատիւ է ինծի համար մաս կազմել անոր յաջորդ հանգրուանին»։
Յիշեցնենք, որ հայկական արմատներ ունեցող եւ իր մասնագիտական ուղիով միջազգային ասպարէզին մէջ յաջողութեամբ առաջացող Ժասմին Սեւանը բնիկ կիպրահայ դիւանագէտ Տիար Պենոն Սեւանի դուստրն է։ Պենոն Սեւան, որ իր երկարամեայ դիւանագիտական գործունէութեան ընթացքին ՄԱԿ-ի շրջանակներուն մէջ բազմաթիւ պատասխանատու առաքելութիւններ իրականացուցած է, այսօր իր դստեր այս նոր նշանակումը կը դիմաւորէ առանձնայատուկ հպարտութեամբ։
Ժասմին Սեւանի այս նոր հանգրուանը ուրախութեամբ կ՚ողջունենք եւ կը յղենք մեր սրտագին խնդակցութիւնները՝ մաղթելով անոր նորանոր վերելքներ, յաջողութիւններ եւ միջազգային նոր ձեռքբերումներ։
