Արեվելք - Արևելք լրատուական

262
26/04/2021

«Գաղթողներու երկիրը» Օսքարի այս տարուան գլխաւոր մրցանակակիր

Լոս Անճելոսի Dolby շարժանկարի թատրոնին մէջ կայացած է Ամերիկեան շարժանկարի ակադեմիայի 93-րդ մրցանակաբաշխութիւնը։ «Գաղթողներու երկիրը» (Nomadland) ամերիկեան ֆիլմը Օսքար մրցանակ նուաճած է գլխաւոր՝ «Տարուայ լաւագոյն ֆիլմ» անուանակարգին մէջ։

Շարժանկարի ստեղծող, չինուհի Քլոէ Չժաոն ճանչցուած է որպէս լաւագոյն բեմադրիչ։ Ան ծնած է Չինաստան, սակայն ապրած եւ աշխատած է ԱՄՆ-ի մէջ։ Ան դարձած է բեմադրական Օսքար ստացած երկրորդ կինը։ Առաջինը 2010 թուականին եղած է Քեթրին Պիկելոուն («Փոթորկի տէրը»)։

Նշենք, որ ֆիլմի սենարի հեղինակը Չժաոյի ամուսինն է։ Ֆիլմը կը պատմէ ամերիկացիներու մասին, որոնք 2008 թուականի նիւթական ճգնաժամի ժամանակ կորսնցուցած են իրենց տուները եւ ճամփորդած են Միացեալ Նահանգներով։ Աւելի վաղ ֆիլմը լաւագոյնը ճանչցուած էր Շարժանկարի եւ հեռուստարուեստի բրիտանական ակադեմիայի կողմէ (BAFTA)։

Լաւագոյն դերասանուհի ճանչցուած է Ֆրանսիս Մաքտորմանտը, որ խաղցած է «Գաղթողներու երկիրը» ֆիլմին մէջ։ Լաւագոյն դերասանը Էնթընի Հոփքինզն է («Հայրը»)։

«Հոգի» մանկական գծագրային (cartoons) ֆիլմը Օսքարի 2 արձանիկ ստացած է: Մէկը՝ որպէս լաւագոյն լիամեթրաժ գծանկարային ժապաւէն (animation film) ֆիլմ, միւսը՝ լաւագոյն երաժշտութեան համար։

Երկրորդական դերի լաւագոյն դերասան ճանչցուած է բրիտանացի Տանիէլ Քալույան «Հուդան եւ սեւ մեսիան» ֆիլմին մէջ դերակատարման համար։ Երկրորդական դերի լաւագույն դերասանուհի ճանչցուած է Եուն Եօ Ճոնը («Մինարի»)։

Դանիացի բեմադրիչ Թոմաս Վինթըրպըրկի Druk տրաման ճանչցուած է լաւագոյն օտարալեզու ֆիլմ։