21.47c
Երեվան
երք, հնս 23
Միջազգայնագէտ Սուրէն Սարգսեան կը կարծէ, որ եթէ Հայաստանը ակնկալիք ունի ԵԱՀԿ Մինսքի խումբէն, ապա այս լարուած իրավիճակին մէջ պէտք է նախաձեռնէ եւ Մինսքի խումբի համանախագահները հրաւիրէ Երեւան: «Մինսքի խմբի համանախագահող պետութիւնների յարաբերութիւնները լարուած են, համանախագահող պետութիւնները փորձում են միմեանց մեղադրել, թէ ինչու չի շարունակւում Մինսքի խմբի գործունէութիւնը: Ամենակարեւոր հարցը չենք կարողանում ստանալ՝ ինչ է ուզում Մինսքի խմբից Հայաստանի իշխանութիւնը»,- այս մասին լրագրողներու հետ զրոյցի ժամանակ ըսած է Սուրէն Սարգսեան:
Միջազգայնագէտի կարծիքով՝ Ատրպէյճանը դէմ է ԵԱՀԿ Մինսքի խումբի գործունէութեան. «Ինչպիսի համանախագահ պէտք է ունենայ Մինսքի խումբը, գլոբալ (ընդհանուր) առումով Ալիեւը չի որոշելու: Եթէ այսօր լարուած են Ռուսաստանի, Ֆրանսայի եւ ԱՄՆ-ի յարաբերութիւնները, դա չի նշանակում, որ վաղն այդ յարաբերութիւնները չեն ուղղուելու: Այստեղ կարեւոր է այն հանգամանքը, որ ԱՄՆ-ն երէկ նոր համանախագահ նշանակեց: Սա նշանակում է, որ ԱՄՆ-ն շարունակում է պնդել, որ Մինսքի խումբը ամենայարմար ձեւաչափն է կոնֆլիկտի կարգաւորման համար, ինչին Հայաստանից ադեկվատ պատասխան չի հնչում»:
Սարգսեան ընդգծած է, որ ԵԱՀԿ Մինսքի խումբէն բացի կան նաեւ ոչ պաշտօնական ձեւաչափեր ղարաբաղա-ատրպէյճանական հակամարտութեան կարգաւորման գործին համար. «Պրիւսէլեան ձեւաչափը ենթադրում է, որ Հայաստանի եւ Ատրպէյճանի ներկայացուցիչները հանդիպում են եւ քննարկում են խնդրի կարգաւորումը, իսկ Մոսկուայում երբ հանդիպում են, քննարկում են նոյեմբերի 9-ի եռակողմ պայմանաւորուածութիւնների կատարումը: Խնդրի կարգաւորմամբ զբաղւում է Պրիւսէլը, ասելով Պրիւսէլ՝ պէտք է հասկանանք նաեւ ԱՄՆ, Ֆրանսա՝ որպէս Մինսքի խմբի համանախագահող պետութիւններ, իսկ միւս կողմը Ռուսաստանն է: Մոսկուային ասում են՝ նոյեմբերի 9-ի փաստաթուղթը ստորագրուել է քո գլխաւորութեամբ, դու էլ այս գործընթացը մինչեւ վերջ տար»:
Յիշեցնենք, որ 24 օգոստոսին Միացեալ Նահանգները ԵԱՀԿ Մինսքի խումբի համանախագահ նշանակած է ԱՄՆ պետական քարտուղարի եւրոպական եւ եւրասիական հարցերով օգնականի նախկին պաշտօնակատար Ֆիլիփ Ռիքըրը: ԱՄՆ պետական քարտուղարութեան ներկայացուցիչը յայտարարած է, որ Ռիքըրի նշանակմամբ ԱՄՆ նպատակ ունի հասնիլ հայ-ատրպէյճանական համապարփակ խաղաղութեան։
