-6.91c
Երեվան
երք, փտր 11
Լիբանանի մէջ օրերս տիրող քաղաքական անկայուն վիճակին, ինչպէս նաեւ վերջինիս ու Սէուտական Արաբիոյ միջեւ տիրող լարուած կացութեան պատճառով Արաբական Ծոցի երկիրներ գտնուող մօտ 500 հազար լիբանանցի արտաքսուելու մտահոգութեան մատնուած են:
«Ալ Արաբիա» լրատուամիջոցին հետ զրոյցի ընթացքին լիբանանցի-սէուտցի գործարարներու խորհուրդի նախագահ Ռաուֆ Ապու Զաքի յայտնած է. «Սարսափի այս ալիքը անտեղի է, եւ լիբանանցիները Արաբական Ծոցի երկիրներէն արտաքսելու որոշումը երեւակայութեան արդիւնք է»:
Վերջինս նշած է նաեւ, թէ զոյգ երկիրներու ժողովուրդներուն եւ կառավարութիւններուն միջեւ գոյութիւն ունեցող պատմական կապերը թոյլ չեն տար, որ Սէուտական Արաբիա արտաքսէ Լիբանանի քաղաքացիները: Ապու Զաքի մանրամասնած է, որ պատմական կապեր ըսելով նկատի ունի երկու երկիրներուն միջեւ տնտեսական փոխադարձ շահերու, առեւտրական փոխանակումներու եւ համատեղ ներդրումներու վրայ հիմնուած յարաբերութիւնները:
Լիբանանցի տնտեսագէտ Ճասէմ Աճաքա նոյնպէս համակարծիք է Ապու Զաքիին, եւ համոզուած է, որ երկու գլխաոր հանգամանքներ կան, որոնք թոյլ չեն տար, որ Արաբական Ծոցի երկիրները արտաքսեն իրենց մօտ գտնուող լիբանանցիները:
Առաջին հանգամանքը Արաբական Ծոցի երկիրներու մշտական աջակցութիւնն ու օժանդակութիւնն է Լիբանանին, որ չի կրնար խաթարուիլ «Հըզպալլա»ի դէմ Ծոցի երկիրներուն ունեցած թշնամանքով:
Երկրորդ հանգամանքը լիբանանցի աշխատուժի կարեւոր դերն է Ծոցի երկիրներուն մէջ, նկատի ունենալով, որ այնտեղ մօտ 500 հազար լիբանանցի տարբեր պաշտօններ, այդ թուին՝ ղեկավար դիրքեր կը զբաղեցնեն, եւ զանոնք արտաքսելով այդ երկիրները լուրջ խնդիրներու առջեւ պիտի կանգնին:
