16.32c
Երեվան
երք, հնս 30
Կիպրոսի հայկական համայնքին համար մարզական նոր ուրախութիւն մը արձանագրուեցաւ, երբ երիտասարդ աթլեթ Անտրանիկ Սարգիս Աշճեան (Որուն յաջողութիւններով միշտ գրած եւ ոգեւորուած է «Արեւելք»ը) համակիպրական Աթլեթիզմի Ախոյեանութեան եռաքայլ ոստումի մրցումին նուաճեց արծաթէ մետալը՝ 15.68 մեթր լաւագոյն արդիւնքով։
Դպրոցական կեանքը նոր աւարտած եւ այսօր Կիպրոսի Ազգային Պահակագունդին մէջ ծառայող Անտրանիկը կը շարունակէ մարզական իր ուղին նոյն վճռակամութեամբ, կարգապահութեամբ եւ յարատեւ կամքով։ Անոր արձանագրած նուաճումը միայն մարզական յաջողութիւն մը չէ, այլ նաեւ երիտասարդ հայորդիի մը կամքի, աշխատանքի եւ բարձր նպատակներու կենդանի վկայութիւնը։
Ի դէպ այս բոլորին մասին ուշագրաւ գրառում մը կատարած է Անդրանիկի հայրը՝ Տօքթ. Անդրանիկ Աշճեանը։
Ստորեւ հայերէնի թարգմանուած անոր գրառումը՝
Հպարտ ծնողներ. հպարտութեան եւս մէկ պահ։
Ջերմ շնորհաւորութիւններ Անտրանիկ Սարգիս Աշճեանին՝ Համակիպրական Աթլեթիզմի Ախոյեանութեան եռաքայլ ոստումի մրցումին արծաթէ մետալ նուաճելուն առիթով, արձանագրելով 15.68 մեթր լաւագոյն արդիւնք։
Միջնակարգ վարժարանը աւարտելէ ետք, Անտրանիկ այժմ կը ծառայէ Կիպրոսի Ազգային Պահակագունդին մէջ, միաժամանակ շարունակելով իր մարզումները եւ հետեւողականօրէն հետապնդելով իր մարզական նպատակները՝ կարգապահութեամբ եւ վճռակամութեամբ։
Տարիներու ընթացքին ան հպարտօրէն ներկայացուցած է Կիպրոսը բազմաթիւ միջազգային մրցումներու մէջ՝ իբրեւ Կիպրոսի աթլեթիզմի ազգային հաւաքականի անդամ, մասնակցելով Եւրոպական, Պալքանեան, Համայունական եւ Համակիպրական ախոյեանութիւններու։
Անոր ձեռքբերումներուն շարքին են՝ 🥈 Արծաթէ մետալ՝ Սլովաքիոյ մէջ կայացած Եւրոպական Երիտասարդական Ողիմպիական Փառատօնին, 🥉 Պրոնզէ մետալ՝ Պահրէյնի մէջ կայացած Աշխարհի դպրոցականներու խաղերուն, 🇨🇾 Կիպրոսի մինչեւ 23 տարեկաններու փակ սրահի եռաքայլ ոստումի մրցանիշակիր՝ 16.06 մեթր արդիւնքով, 🏆 Բազմաթիւ ազգային տիտղոսներ եւ պատուոյ հարթակի վրայ նուաճումներ, 🎖️ Բազմիցս պարգեւատրուած եւ գնահատանքի արժանացած Կիպրոսի Հանրապետութեան Նախագահին, ինչպէս նաեւ տարբեր մարզական ֆետերասիոններու եւ կազմակերպութիւններու կողմէ։
Անոր ճանապարհը կերտուած է ծանր աշխատանքի, յարատեւութեան եւ կարգապահութեան վրայ։ Շուտով ան պիտի սկսի իր համալսարանական ուսումը՝ միաժամանակ շարունակելով հետապնդել իր երազանքը՝ եռաքայլ ոստումի մէջ հասնելու աւելի բարձր նուաճումներու։
Մենք անսահման հպարտ ենք այն երիտասարդով, որ դարձած է Անտրանիկը, եւ իրեն կը մաղթենք նորանոր յաջողութիւններ յառաջիկայ տարիներուն։ Լաւագոյնը տակաւին առջեւն է։
Տէր եւ Տիկին Տօքթ. Անդրանիկ եւ Ալին Աշճեաններու ընտանիքը
