24.09c
Երեվան
երք, սպտ 15
Թուրքական մամուլը շարունակում է անդրադառնալ վեճի առարկա դարձած այն տարածքին, որը, տարիներ շարունակ տևած բանակցություններից հետո, օրերս հանձնվել է Թուրքիային: «Դեյլի Սաբահը» նշում է, որ Թուրքիայի և Վրաստանի սահմանագիծ հանդիսացող Շաք Սու գետի ընթացքը 40 տարի առաջ փոխելու և գետի հունը դեպի թուրքական հողերը տանելու հետևանքով, Թուրքիան կորցրել էր 15,000 մետր տարածություն, որը բնական կերպով հայտնվել էր Վրաստանի տարածքում:
40 տարի առաջ նշված տարածքի վերաբերյալ երկու երկրների միջև վեճ էր ծագել: Այդ ժամանակ, ինչպես նշում է թերթը, Վրաստանը դեռևս գտնվում էր Խորհրդային Միության տարածքում: Վեճը շարունակվել է Վրաստանի անկախությունից հետո, և օրերս երկու երկրների միջև այդ հարցի վերաբերյալ բանակցությունները վերջապես հանգուցալուծում են ստացել: Կազմված արձանագրությամբ որոշվել է գետի հունը վերադարձնել 40 տարի առաջ եղած ընթացքին և Թուրքիայի հողը վերադարձնել նրան:
Օրերս ի հայտ է եկել նաև, որ գետի հունը փոխելուց առաջ նշված հողատարածքը անձնական սեփականութիւն է եղել և պատկանել է Թուրքիայի քաղաքացի Սուլեյման Չելիքին, որն այսօր 78 տարեկան է: Ինչպես գրում է թերթը, Չելիքը, Թուրքիայի կողմից Վրաստանից տարածքի վերատիրացման լուրը լսելուց հետո, ասել է. «Ես խորը ցավ եմ ապրել, երբ 40 տարի առաջ կորցրել եմ հողս: Բազմաթիվ բողոքներ եմ հղել իշխանություններին, սակայն նրանք անփույթ են վերաբերվել իմ պահանջին, և միայն 2013 թ.-ին է կառավարությունը որոշել հանձնաժողով կազմել և բանակցությունների գնալ»:
Հողատարածքը կրկին վերադարձվել է տիրոջը: Չելիքը հայտնել է, որ հողատարածքը շատ բերրի է և այն օգտագործելու է գյուղատնտեսական նպատակներով:
Վրացական մամուլն իր հերթին նշում է, որ վրացական հասարակությունը հատուկ ուշադրություն չի դարձրել երկրի տարածքային ամբողջականության խախտման վերջին փաստին:
