12.09c
Երեվան
չրք, մյս 13
Անցնող հինգ-վեց տարիներուն սուրիահայութիւնը բաւական ծանր օրեր ապրեցաւ: Միջին Արեւելքի մէջ կեդրոնական դեր ունեցող համայնքը նոսրացաւ եւ պատերազմին հետեւանքով աւելի քան երեք հարիւր սուրիահայեր զոհուեցան եւ հարիւրաւոր ուրիշներ յայտնուեցան գաղթականի կարգավիճակի մը մէջ:
Այս բաւական արիւնոտ օրագրութեան մէջ քիչ չեղաւ թիւը այն սուրիահայերուն, որոնց իրենց փրկութեան եզերքը համարեցին Հայաստանը, որն իր կարգին լայն բացաւ իր թեւերը ապաստան փնտռող իր զաւակներուն առջեւ:
Պատկերը ամբողջական դարձնելու համար պէտք է անպայման նշել, որ երեք միլիոն բնակչութիւն ունեցող Լիբանանի մէջ այսօր կ'ապրին շուրջ մէկ ու կէս միլիոն սուրիացի փախստականներ, որոնցմէ շատ-շատերը յայտնուած են բաւական բարդ վիճակներու մէջ:
Այս օրինակը բերինք, պարզ յիշեցում մը կատարելու բոլոր անոնց, որոնց համար Հայաստանը քննադատելը դարձած է աժանագին համբաւ մը ձեռք ձգելու միջոց: Ու անկէ անդին կայ նաեւ Հայաստանի մարմիններուն եւ յատկապէս ՀՀ սփիւռքի նախարարութեան (գլխաւորութեամբ տիկին նախարար ՝ Հրանուշ Յակոբեանի) պաշտօնեաներուն եւ աշխատակիցներուն բարձրաձայն շնորհակալութիւն մը յայտնելու խնդիրը, որովհետեւ անոնք իրենց բոլոր կարելիութիւններն ու միջոցները ծառայեցուցին, որպէսզի Երեւան ապրող մեր հայրենակիցները լաւ զգան, գործ հիմնադրեն, աշխատանք ստեղծեն եւ մէկ խօսքով հաւատան որ իրենց վերջին կայանը Մայր Հայրենիքն է:
Մենք` լիբանանահայերս ծանր պատերազմի ամէնէն «գունաւոր» օրերը եւ տառապանքները ապրած ենք: Մենք գիտենք խաղաղութեան ամբողջական իմաստը, գիտենք նաեւ, որ Լիբանանի քաղաքացիական պատերազմի օրերուն մեզի համար բաւական բարդ խնդիր էր Հայաստան հաստատուիլը:
Ճիշդ է, որ Խորհրդային Հայաստանն ալ արժէքաւոր էր, սակայն կար մտայնութեան, կենցաղի, մօտեցումներու եւ այլ տիպի կարեւոր տարբերութիւններ, որոնք պատճառ կը դառնային, որ «Սովետական ազատ աշխարհ Հայաստան»ը շարունակէ մնալ... հեռաւոր եւ կիսատ երազ մը:
Այսօր իրավիճակը տարբեր է, տարբեր է, որովհետեւ սուրիահայ մեր եղբայրներուն եւ քոյրերուն համար շատ աւելի հեշտ պայմաններ կան Հայաստանի մէջ:
Ու վստահ ենք, որ անոնցմէ շատ- շատերը վճռած են ամէն գնով ապրիլ ու ստեղծել մեր ու իրենց երկրին ՝ Հայաստանի մէջ:
Ու գաղտնիք ալ չէ, որ սուրիահայերուն համար նոյն պայմանները չկան Լիբանանի մէջ:
Այս բոլորէն անդին յստակ է նաեւ, որ մենք եւ սուրիահայ մեր հայրենակիցները այսօր, աւելի քան որեւէ ժամանակ պատրաստ են շնորհակալութիւն յայտնել մեր ու իրենց Հայաստանին ու բարձրաձայնեն՝ «Շնորհակալութիւն Հայաստան»:
«Արարատ»/ Պէյրութ
