19.6c
Երեվան
չրք, հնս 10
Պէյրութի քրիստոնէաբնակ Էշրաֆիէ շրջանի «Զահրէթ Ալ Իհսան» քրիստոնէական (յոյն ուղղափառներու) դպրոցը տարածաշրջանին մէջ կ'առանձնանայ սերունդներուն քրիստոնէական բարձր արժէքներով օժտելու իր հետեւողականութեամբ:
Սակայն այլ է պատկերն այսօր: «Lebanon Debate» կայքի փոխանցմամբ, դպրոցի նորանշանակ տնօրէնութիւնն այլ մօտեցում որդեգրած է: Դպրոցը միանալով երեք այլ ուղղափառ դպրոցներու, վերջիններուս հետ կազմած է ուսումնական միացեալ հաստատութիւն մը՝ «Eduvation» անունով:
Աղբիւրը նշած է նաեւ, որ աշակերտներու ծնողները դժգոհութիւն յայտնած են Հայր Տիմասի գլխաւորութեամբ տնօրէնութեան քայլին դէմ, որ դպրոցէն ներս կ'արգիլէ ամէն տեսակի կրօնական խորհրդանիշներ կրելը, հակառակ անոր, որ դպրոցը յոյն ուղղափառներու Անտիոքի պատրիարքարանին կը պատկանի:
Ծնողները ապարդիւն ջանքեր ի գործ դրած են տնօրէնութեան հետ լեզու գտնելու համար, փորձելով համոզել, որ վերջինս ետ կանգնի իր որոշումէն, սակայն պատասխանը եղած է՝ «Չէք հաւնիր, դուրս բերէք ձեր երեխաները» արտայայտութիւնը:
Միւս կողմէ ծնողներուն զայրոյթ առաջացուցած է դպրոցէն ներս բջիջային հեռախօսներն ու համացանցային կապը չարգիլելու տնօրէնութեան որոշումը, որ կրնայ երեխաները շեղել ուսման հետեւելէն:
