19.09c
Երեվան
ուրբ, հկտ 09
Եւրոպական կառոյցներու կողմէ քաղաքական վերջին զարգացումներու մասին Թուրքիոյ մասին պախարակումներն ու յայտարարութիւնները իրնց արձագանգը կը գտնեն մամուլի մէջ ու կը կեդրոնանան այն վարկածի վրայ, որ այս գնացքով անկարելի է շարունակել Թուրքիա-Եւրոմիութիւն բանակցութիւնները:
Այսպէս, գերմանական «Շփիկէլ» թերթը ուշագրաւ լրատուութիւն մը հրապարակեց Թուրքիոյ անդամակցութեան վերաբերեալ: «Թաքուն հրաժեշտ» խորագրեալ յօդուածին մէջ գերմանական ամսագիրը յառաջ կը քաշէ այն վարկածը, թէ Եւրոմիութիւնը կը պատրաստուի դադրեցնել Թուրքիոյ հետ բանակցութիւնները:
Ըստ աղբիւրին, Եւրոմիութիւնը չի համարձակիր պաշտօնապէս խզել Թուրքիոյ հետ յարաբերութիւնները, սակայն Եւրոպայի համարկումի գործընթացը դադրեցնելու ուղղութեամբ արդէն իսկ յստակ քայլեր մշակուած են: Մասնաւորաբար, Թուրքիոյ Եւրոմիութեան անդամակցելու նախապատրաստութիւններու համար մինչեւ 2020 թուականը տրամադրելիք 4.5 միլիառ եւրօ գումարը կը գործածուի այլ նպատակներու համար:
Յայտնի դարձած է որ այդ գումարները Եւրոմիութիւնը պիտի գործածէ Թուրքիոյ մէջ ապաստանած սուրիացի փախստականերուն աջակցելու համար: Միաժամանակ պիտի դադրին կարգ մը նախագիծեր, որոնք Թուրքիոյ մէջ նախատեսուած էին Եւրոմիութեան հովանաւորութեամբ: Ատոնցմէ մէկն է վճռաբեկ ատեանները զարգացնելու նախագիծը: Այդ նպատակով եւրոմիութեան կողմէ տրամադրուած 22 միլիոն եւրօն ետ պահանջուած է Թուրքիայէն՝ այդ գումարները նպատակին չծառայելու պատճառաբանութեամբ:
