-2.91c
Երեվան
ուրբ, դկտ 27
Թուրքիոյ իշխանութիւնները պարէտային ժամ յայտարարած են մեծամասնութեամբ քրտաբնակ 16 շրջաններու մէջ: Այս մասին լուր փոխանցող աղբիւրներ նաեւ կը յայտնեն, որ ծանր իրադրութիւն կը տիրէ մասնաւորապէս Տիարպէքիր նահանգին մէջ: Շրջանի քաղաքապետ Հիւսէյն Աքսու ըսած է, թէ մասնաւորապէս Սիլվան շրջանին մէջ ապահովական մարմիններ ծանր միջոցառումներու դիմած են եւ շրջանի բնակիչները կ'ապրին վախի ու սարսափի մթնոլորտ մը: Իր կարգին Human Rights Watch կազմակերպութիւնը այսօր հաղորդագրութեամբ մը հանդէս գալով դատապարտած է Թուրքիոյ իշխաննութիւններուն արարքները՝ նկատել տալով, որ դատական մարմինները արդար կերպով չեն գործեր: Այս զարգացումներուն առընթեր այսօր յայտնի դարձաւ, թէ Մարտին քաղաքին մէջ իրենց պաշտօնէն հեռացուած են 2 թաղապետներ քրտական PKK–ին հետ համագործակցելու մեղադրանքով: Յիշեցնենք, որ անցեալ տարի սկիզբ առած զինուորական բախումներուն հետեւանքով սպաննուած են քիւրտ աւելի քան 2000 զինեալներ մինչ թրքական բանակի զոհերուն թիւը կը գնահատուի 500-ով: Կը հաղորդուի նաեւ, որ տարբեր պայմաններու տակ սպաննեալ անզէն քաղաքայիններուն թիւը կը հասնի 400-ի: Թուրքիոյ մէջ ընթացող զարգացումներուն հետեւողներուն համար աննախընթաց է այսօր Թուրքիոյ իշխանութիւններուն 16 շրջաններու մէջ պարէտային ժամ յայտարարելու որոշումը:
