Ինչպէս կը տեղեկացնեն «Ազնաւուր» հիմնադրամէն, աշխարհահռչակ ֆրանսահայ երգիչ Շառլ Ազնաւուրը բաց նամակ յղած է հայրենակիցներուն, որ կը ներկայացնենք ստորեւ.
«Հայաստանի մէջ գտնուող իմ շա՜տ սիրելի քոյրեր եւ եղբայրներ, Կը շնորհաւորեմ ձեզ, որ կրցաք առանց արեան, բռնութեան, արժէքներու ոտնահարման անցում ապահովել երկրին մէջ մէկ այլ իրողութեան: Քաղաքացիական անհնազանդութեան օրերուն եւս դրսեւորեցիք արժանապատիւ ու մարդասիրական կեցուածք` լուծում առաջարկելով ծագող խնդիրներուն այնքան սահուն ու արագ, կարծես ատիկա դիւրին էր: Սա զարմացուց եւ մտածելու տեղի տուաւ շատ այլ երկիրներու կառավարութիւններու: Մեզի` սփիւռքի հայերուս համար մեծ հպարտութիւն էր ցոյց տալ աշխարհին, որ կայ փոքր երկիր մը, որուն քաղաքացիները բացառիկ իմաստնութիւն եւ մարդասիրութիւն դրսեւորեցին` ապացուցելով, որ բռնութիւնը խաղաղութեան եւ փոխըմբռնման տանող ճանապարհ չի կրնար ըլլալ:
Մեր պատմութեան ընթացքին շատ դժուարութիւններ ունեցած ենք: Հիմա կը բանանք երջանկութեան, իմաստնութեան եւ սիրոյ էջը: Դուք յաջողեցաք ապացուցելու, որ մեր ազգն ունի գիտակցութեան բարձր աստիճան, եւ որ մեր երկրին համար առաջնահերթ է ու միշտ ալ պէտք է առաջնահերթ մնայ ամենակարեւորը` միաւորումը: Այս միաւորումն է, որ թոյլ կու տայ ապահովել երկրի բարեկեցութիւնը եւ քաղաքացիներուն միջեւ բարեացակամ վերաբերմունքը: Դուք յաջողեցաք ապացուցելու, որ հնարաւոր է ապրիլ միաւորուած եւ պատասխանատուութեան բարձր զգացումով: Մենք` հայերս, կրցանք ցոյց տալ, որ «ժողովուրդ», «հայրենիք», «դրօշ», «մշակոյթ», «կրօն» եւ «ընտանիք» բառերը մեր արժէքներն են: Եւ որ իւրաքանչիւր հայ իր երկրին մէջ ունի հաւասար իրաւունքներ ու ազատութիւններ:
Ես, հաւանաբար, աշխարհի հայերէն ամենաֆրանսացին եմ, սակայն ես հպարտ եմ իմ Հայաստանով եւ երբեք չեմ թաքցուցած ատիկա: Շնորհակալութիւն հայ ժողովուրդին` աշխարհին մեր մարդասիրութիւնը ցոյց տալու համար․ Հայաստանը մեծ է իր արժէքներով: Օրինա՛կ ըլլանք բոլոր անոնց համար, որոնք տարբեր են, գուցէ նաեւ` ոչ այնքան բաց փոփոխութիւններու առջեւ: Եկէք առաջ ընթանանք նոյն ճանապարհով: Վստահ եմ` այն լաւագոյնն է մեր ազգի եւ ժողովուրդի ապագայի համար: Շնորհակալ եմ իւրաքանչիւրիդ հպարտութեան այս մեծ զգացումն ինծի պարգեւելու համար:
Կեցցէ՛ Հայաստանի Հանրապետութիւնը»: