-1.91c
Երեվան
ուրբ, նմբ 08
Փաքիստանի դատարանը երկրի նախկին վարչապետ, ընդդիմադիր «Արդարութեան շարժում» կուսակցութեան առաջնորդ Իմրան Խանը եւ անոր կինը՝ Պուշրա Պիպիը, դատապարտած է 14 տարուան ազատազրկման՝ կաշառակերութեան եւ օտարերկրեայ պետական նուէրներու ապօրինի վաճառքի գործով։ Այս մասին յայտնած է Dawn թերթը։
Աւելի վաղ Խանը եւ նախկին արտաքին գործոց նախարար Շահ Մեհմուտ Քուրեշին յատուկ դատարանի կողմէ դատապարտուած էին 10 տարուան ազատազրկման՝ պետական գաղտնիքի մասին օրէնքը խախտելու մեղադրանքով, յայտնած է aljazeera.com-ը։
Խանը ղեկավարած է Փաքիստանի 2018-էն 2022 թուականներուն։ Կառավարութեան նախկին ղեկավարը պաշտօնանկ եղած է 2022 թուականի ապրիլ 10-ին՝ անոր անվստահութիւն յայտնելու քուէի որպէս հետեւանք։
Խանի նկատմամբ հետաքննութիւնը սկսած է այն բանէ ետք, երբ ան 2022 թուականի մարտ 27-ին հրապարակայնօրէն յայտարարած է, որ գաղտնագրուած հեռագիր ստացած է Ուաշինկթընի մէջ Փաքիստանի դեսպանէն, որուն մէջ, ըստ քաղաքական գործիչի, նշուած էր, որ ԱՄՆ ներկայացուցիչները դիւանագիտական առաքելութեան ղեկավարի հետ զրոյցին «խորհուրդ տուած են վարչապետը հեռացնել իշխանութիւններէն՝ Ուքրանիոյ հարցով անոր ռուսամէտ դիրքորոշման պատճառով, որ դրսեւորուած է 2022 թուականի փետրուարին Մոսկուա կատարած այցի ժամանակ»։
