5.09c
Երեվան
ուրբ, նմբ 22
Գահիրէին տխուր լուր ստացանք։ Երէկ յանկարծամահ եղած է եգիպտահայ ճանչցուած արուեստագէտ՝Վահան Դելփեան։
Առաւելաբար, որպէս քանդակագործ հանրութեան ներկայացող Վահան իր ուրույն տեղն ունէր Եգիպտոսի արուեստի շրջանակներուն մէջ։
Ան կը ներկայացնէր քանդակներ, նկարչական պաստառներ եւ հմուտ էր նաեւ նաեւ արուեստի ներկայացման-Instalation-ի ի ոլորտին մէջ։Վահան ծնած է եւ մեծցած էր Գահիրէի մէջ։ Ան նախնական կրթութիւն ստանալէ ետք հետեւած է արուեստի ուսումնառութեան ապա սկսած է հանդէս գալ թէ անհատական եւ թէ ալ հաւաքական ցուցահանդէսներով։
Մասնաւորապէս վերջին տարիներուն տեղական մամուլը բազում հրապարակումներ կատարած է Վահանի մասին, զինք համարելով երկրի առաջադէմ արուեստի լաւագոյն անուններէն մին։
Նշենք նաեւ, որ Վահան Դելփեան կը համարուէր եգիպտահայ տաղանդաւոր նկարիչ Շանթ Աւետիսեանի (հանգուցեալ) ամէնէն առաջադէմ ուսանողներէն մին։
Վահանի անանկալ մահը մեծ վիշտ պատճառած է անոր հարազատներուն, բարեկամներուն ու յատկապէս արուեստի ոլորտի գործիչներուն համար։
Այս առթիւ մեր խորազգաց ցաւակցութիւնները կը յղենք Վահանի բոլոր հարազատներուն եւ յատկապէս Եգիպտոսի ՀՄԸՄ-ի մեծ ընտանիքի նուիրեալ պատասխանատուներէն՝ Տիար Լեւոն Դելփեանին։
Ստորեւ կը ներկայացնենք Վահան Դելփեանի հակիրճ կենսագրութիւնը։
Վահան Դելփեան ծնած է 20 հոկտեմբեր 1963-ին Գահիրէի մէջ։ Համալսարանական ուսումը ստացած է «Հելուան»ի համալսարանի գեղարուեստի հիմնարկին մէջ ուրկէ վկայուած է 1988-ին։
Ան Եգիպտոսի գեղարուեստի նկարիչներու սենտիքայի անդամ էր, եւ ունեցած է անհատական շարք մը ցուցահանդէսներ, ինչպէս նաեւ մասնակցած է տասնեակ հաւաքական ցուցահանդէսներու։
Կը յիշենք իր կարգ մը ցուցահանդէսները՝
- Գահիրէի Պերլին պատկերասրահին մէջ, լուսանկարչութիւն + քանդակ, 1992-ին:
- Զամալէք արուեստի համալիրին մէջ, լուսանկարչական ցուցահանդէս- բարձրաքանդակ-քանդակ եւ (installation) տարածարուեստ 1995-ին:
- Ցուցահանդէս Զամալէքի Արուեստի Համալիրին մէջ 1999-ին:
Տեղական խմբային ցուցահանդէսներ
1983 թուականէն մինչեւ այսօր մասնակցած է տարբեր տեղական խմբային ցուցահանդէսներու որոնցմէ կը յիշենք՝
- Վեցերորդ Պատանեկան Սրահ 1994, Ութերորդ 1996, Իններորդ 1997, Տասներորդ 1998։
- Ազգային կերպարուեստի ցուցահանդէս, նիստ (25) 1997-ին:
- Փոքր ստեղծագործութիւններու չորրորդ սրահ, 2000-ին:
- Նուր Ալ-Շաքլ ցուցահանդէս, երրորդ նիստ, Արուեստներու պալատին մէջ, մայիս 2017-ին:
- Երկրորդ քանդակներու սրահը Արուեստներու պալատին մէջ, սեպտեմբեր 2018-ին:
- Ցուցահանդէս (Եգիպտական Սուտանի կերպարուեստ) Ռամատանի մշակութային կեդրոնին մէջ Թահա Հուսէյնի թանգարան, նոյեմբեր 2019-ին:
Միջազգային խմբային ցուցահանդէսներ/արտերկրեայ ցուցահանդէսներ՝
- Քանդակի չորրորդ միջազգային սիմբոզիում Ասուան 1999 թուական։
- Գահիրէի հինգերորդ միջազգային խեցեգործութեան երկամեայ ցուցահանդէսը 2000-ին:
- Գահիրէի ութերորդ միջազգային երկամեայ ցուցահանդէսը դարձեալ 2000-ին:
Տեղական եւ միջազգային հանրագիտարաններ, որոնք կը պարունակեն նկարիչին անունը:
- Երիտասարդական Սրահի Հանրագիտարան, Մաս Երկրորդ, պատրաստուած քննադատ/Մուհամմէտ Համզայի կողմէ, 2002թուականին, թողարկուած կերպարուեստի բաժանմունքին կողմէ:
Տեղական մրցանակներ ստացած է որոնցմէ կը յիշենք՝
- Երիտասարդական Սրահի վեցերորդ մրցանակը 1994-ին:
- Երկրորդ մրցանակ իններորդ երիտասարդական սրահին մէջ 1997-ին:
Պաշտօնական հաւաքածոներ՝
- Ժամանակակից եգիպտական արուեստի թանգարան:
