Սուրիական պատերազմի հոլովոյթին մէջ բաւական տրամադիք զարգացումներ տեղի կ'ունենան: 19 Դեկտեմբերին «Հըզպալլա»ի պատասխանատուներէն` Սամիր Քընթարի սպանութենէն մէկ շաբաթ ետք Դամասկոսի գիւղական «Ալ Պըրժ» շրջանին մէջ հաշուեյարդարի կ'ենթարկուի Րիատի թիւ մէկ մարդը համարուող ` Զահրան Ալլուշը:«Ժայշ Ալ Իսլամ»ի գլխաւոր պատասխանատուն կը սպաննուի ռուսական կործանիչներու հարուածով, հակառակ անոր, որ Սուրիոյ բանակի մէկ բանբերը «Սանա» լրատուականի միջոցաւ կը յայտնէ, որ Ալլուշ սպաննուած է կառավարական ուժերու կրակներով: Ռուսիոյ պաշտպանութեան նախարարութիւնը մինչ լռութիւն կը պահէ դէպքին շուրջ, մէկէ աւելի գործակալութիւններ կարեւոր մանրամասնութիւններ յայտնելէ բացի կը վստահեցնեն, որ հարուածը ռուսական է: Մոսկուա այս արարքով (նոյնիսկ եթէ պաշտօնապէս չըստանձնէ) գործողութեան պատասխանատուութիւնը), քանի մը պատգամներ յղած պիտի ըլլայ «սուրիական խաղին» մասնակիցներուն, որոնց ամէնէն կարեւորը Րիատին ուղղուած նամակն է: Մոսկուա առկայ խաղը աւելիով կը բանայ եւ կը փորձէ բոլոր կողմերուն ներգրաւուածութիւնը ապահովել: Բացի անկէ նաեւ կը հաստատէ, թէ յառաջիկայ 2016-ի առաջին ամսուան ընթացքին Ժընեւի մէջ մասնակցութիւն ունենալիք ընդդիմադիր կողմերու համալրումը պիտի կատարուի միայն իր վճիռով: Տեղին է յիշեցնել, թէ Ալլուշ, որ նաեւ Սուրիոյ ընդդիմութեան «չափաւորական» թեւին անդամ էր, քանիցս խոստացած էր գետնի հաւասար ընել Դամասկոսը: Բացի ատկէ, Ռուսիոյ այս քայլը կը միտի ընդհանուր հասարակ յայտարար մը մէջտեղ բերել: Մոսկուա ամէն գնով կը կրկնէ Սէրկէյ Լավրովի խօսքը, ըստ որուն լաւ եւ վատ ահաբեկիչներ չկան , այլ կան միայն ահաբեկիչներ: Սպիտակ քարերով կատարուած այս խաղադրոյքը վստահաբար նոր ճանապարհ պիտի բանայ սուրիական բանակին համար, բացի անկէ, որ Ղութա շրջանը բաւականին խրթին, զինուորապէս ճահճային եւ ընդդիմադիրներու Գանտահարը համարուող շրջան մըն է: Տեղին է նշել նաեւ, որ վերջին օրերուն մէկէ աւելի Սիւննի աղբիւրներ վերլուծումներ կը հրապարկեն այն մասին, որ լիբանանցի Սամիր Քընթարի սպաննութիւնը այլ հարցերու կողքին Մոսկուա- Իրան լարուածութիւնը վերացնելու կը ծառայէր: Կը մնայ հարցումը, արդեօ՞ք Զահրան Ալլուշի սպաննութեամբ Մոսկուա կը միտի ընդհանուր «հաւասակշռութիւն» մը ստեղծել, այդքան տագնապալի , այդքան ծանր եւ այդքան կարմիրով ընդգծուած Սուրիոյ պատերազմի այս հանգրուանին համար: