Երեւանի մէջ ՄԱԿ–ի գրասենեակի մօտ բողոքի արշաւ իրականացնող երիտասարդներուն յայտնած են, որ իրենց նամակը փոխանցուած է ղեկավարութեան։
Նշենք, որ արշաւը իրականացուած է յաջակցութիւն արցախցի Վագիֆ Խաչատրեանի, որուն 29 յուլիսին ատրպէյճանցի սահմանապահները առեւանգած էին Լաչինի միջանցքին վրայ գտնուող ապօրինի տեղադրուած անցակէտէն։
Աքթիւիսթ Նարեկ Այվազեանը նշած է, որ իրենց նամակը արդէն փոխանցուած է հայստատանեան գրասենեակի ղեկավարութեան, սակայն դեռ չեն կրնար ըսել, թէ երբ պատասխան կ'ըլլայ։
«Խնդրել ենք, որպէսզի փորձեն գոնէ մօտաւոր ժամկէտ նշել, թէ երբ կը լինի մեր նամակի պատասխանը»,–ըսած է Այվազեանը։
Մինչ այս մօտ 20 վայրկեանով արշաւի մասնակիցները փակած էին ՄԱԿ գրասենեակի բոլոր մուտքերն ու ելքերը։
Այվազեանը յայտարարած է նաեւ, որ մինչ օրս Ազատութեան հրապարակին մէջ ժամը 19։00-էն սկսող իրենց հանրահաւաքները այսուհետեւ պիտի տեղափոխուին ՄԱԿ գրասենեակի մօտ։
Նշենք, որ օրեր առաջ բազմաթիւ քաղաքացիներու բերած պարէնամթերքը ՄԱԿ-ի գրասենեակի մօտ կը շարունակեն այդպէս դրուած մնալ դարպասներու եւ ճաղերու մօտ։