32.09c
Երեվան
երք, հլս 15
Օրերս, Մոնթրէալի մէջ, նախագահութեամբ Հայց. Առաքելական Եկեղեցւոյ Թեմակալ Առաջնորդ՝ Գերշ. Տ. Բաբգէն արք. Չարեանի տեղի ունեցած է կիրակնօրեայ վարժարաններու յատուկ դասագիրքերու ներկայացման հանդիպում-շնորհանդէս։
Այս մասին «Արեւելք» վերահասու դարձաւ Թեմի դիմատետրեան էջէն։
Ստորեւ հրապարակուած հաղորդագրութիւնը՝
Հինգշաբթի, 3 Յուլիս 2025-ին, նախագահութեամբ՝ Թեմիս Առաջնորդ Գերաշնորհ Տ. Բաբգէն Արքեպիսկոպոս Չարեանի, Մոնթրէալի Հայ Կեդրոնի «Ահարոնեան» սրահին մէջ տեղի ունեցաւ Կիրակնօրեայ Նոր Դասագիրքերու շնորհահանդէսը:
Ներկայ էին՝ Ազգային բարերար եւ դասագիրքերու մեկենաս՝ Տիկին Շաքէ Կէօնճեան, դասագիրքերու հեղինակ՝ Պարոն Արշաւիր Գաբուճեան, հոգեւոր հայրեր, միութեանց ներկայացուցիչներ, բարերարներ, բարեկամներ, Կիրակնօրեայ Դպրոցներեու տնօրէններն ու ուսուցչական կազմերը եւ աշակերտները:
Հանդիսավարներն էին՝ զոյգ Կիրակնօրեայ Դպրոցի աշակերտները, որոնք բարի գալուստ մաղթեցին ներկաներուն, արտայայտելով իրենց կապուածութիւնն ու սէրը Կիրակնօրեայ Դպրոցին հանդէպ: Ապա հրաւիրեցին իրենց քոյրերն ու եղբայրները երգելու Կիրակնօրեայ Դպրոցներու մաղթերգը:
Մաղթերգի երգեցողութենէն ետք, Ազգային Առաջնորդարանի Քրիստոնէական Դաստիարակութեան Բաժանմունքի Վարիչ՝ Հոգեշնորհ Տ. Յակոբ Վարդապետ Եագուպեան, փոխանցեց բաժանմունքի խօսքը, շեշտելով. «Քրիստոնէական Դաստիարակութիւնը պէտք է նկատուի ոչ թէ ընտրելի, այլ անբաժանելի մասնիկը հայ ինքնութեան պահպանման գործին մէջ»:
Իր խօսքին աւարտին, Հոգեշնորհ Հայր Սուրբը երախտագիտութիւն յայտնեց բոլոր անոնց, որոնք իրենց բաժինը բերած էին այս Դասագիրքերու կազմութեան եւ հրատարակութեան աշխատանքներուն:
Սուրբ Յակոբ Եկեղեցւոյ Կիրակնօրեայ Դպրոցի աշակերտներէն խումբ մը, երգեցին «Նոր Ծաղիկ» մեղեդին: Ապա, Դպրոցի տեսուչ՝ Բարեշնորհ Թորոս Սարկաւագ Պապիկեան, ներկայացուց Կիրակնօրեայ Դպրոցի առաքելութիւնն ու կենսաւորութիւնը՝ կարեւորելով անոր պատմական արմատներն ու պահպանման անհրաժեշտութիւնը: Ան շեշտեց, «Ժամանակին, երբ ընտանիքները հայախօս էին, հայ կրօնքն ու մշակոյթը բնականօրէն կը փոխանցուէր սերունդէ սերունդ, Կիրակնօրեայ Դպրոցը կարեւոր օղակ մըն էր այդ ժառանգութիւնը ամրապնդելու գործին մէջ: Այսօր, երբ մարտահրաւէրները շատցած են, ազգային քրիստոնէական ինքնութիւնը սպառնալիքի տակ է, կորսուելու վախը կ'ապրինք ամէն օր, դպրոցներուն մէջ քրիստոնէական արժէքները չեն փոխանցուիր՝ Կիրակնօրեայ Դպրոցը ոչ միայն կարեւոր, այլ կենսական դեր ունի»:
Սուրբ Գէորգ Եկեղեցւոյ Կիրակնօրեայ Դպրոցի աշակերտներէն խումբ մը երգեցին «Երբ Սուրբ Հոգին իմ մէջ գործէ» երգը:
Ապա, Դասագիրքերու հեղինակ՝ Պարոն Արշաւիր Գաբուճեան ներկայացուց երահատոր դասագիրքերու պատրաստութեան ամբողջ գործընթացը, խօսելով՝ դասագիրքի բովանդակութեան, աշախատանքային գրքոյկի եւ ուսուցիչի ուղղեցոյցի մասին: Ան իր խօսքին մէջ ըսաւ, որ իւրաքանչիւր աշակերտ, ուսուցիչ կամ հաւատացեալ, երբ սոյն երեք դասագիրքերը կարդայ, համարեա կարդացած կ'ըլլայ ամբողջ Աստուածաշունչը: Իր խօսքի աւարտին ան կոչ ուղղեց, որ Աստուածաշունչը բոլորին կեանքի անբաժան մէկ մասնիկը ըլլայ, այլապէս բոլորիս կեանքը ճահիճի կը վերածուի:
Ապա, Առաջնորդ Սրբազան Հայրը, Տիկին Շաքէ Կէօնճեանը, Պարոն Արշաւիր Գաբուճեանը եւ Հայր Յակոբը կատարեցին գինեձօնի արարողութիւնը:
Աւարտին, Առաջնորդ Սրբազան Հայրը փոխանցեց իր սրտին խօսքը: Ան վերարժեւորեց կրթական այս նոր նախաձեռնութեան կարեւորութիւնը մեր համայնքային կեանքէն ներս: Ան ընդգծեց, որ Դաստիարակութիւնը հիմնաքարը կը կազմէ մեր եկեղեցւոյ, ժողովուրդին եւ սերունդներու գոյատեւման:
«Այս դասագիրքերը միայն էջեր չեն՝ այլ սերմեր են, որ ցանուած են մեր զաւակերուն հոգիներուն մէջ: Սերմեր՝ որոնք պիտի ծլին՝ հաւատքով, որոնք ջուր պիտի ստանան՝ աղօթքով ու ուսուցմամբ, եւ որոնք պիտի պտղաբերին՝ Աստուծոյ սիրոյն մէջ», ըսաւ Սրբազան Հայրը:
Ապա իր երախտագիտութիւնը արտայայտեց՝ Տիկին Շաքէ Կէօնճեանին, որ իր լուման դրաւ այս աստուածահաճոյ ծրագիրի իրականցման, ինչպէս նաեւ՝ Պարոն Արշաւիր Գաբուճեանին իր կատարած բծախնդիր աշխատանքին համար: Առաջնորդ Սրբազանը նաեւ գնահատեց Հայր Յակոբը, իր տարած աշախատանքին համար:
Երեկոն իր աւարտին հասաւ Առաջնորդ Սրբազան Հօր «Պահպանիչ» աղօթքով:
.png)
