18.09c
Երեվան
հնգ, մրտ 13
Կառավարութեան հաշուեհամարին մէջ հաւաքուած է 5 միլիառ 474 միլիոն դրամ, իսկ ծախսերը կազմած են 6 միլիառ 272 միլիոն դրամ: Հաւաքուած գումարէն մօտ 800 միլիոն աւելի ծախած ենք. գումարին մեծ մասը ուղղուած է առաջնագիծի անվտանգութեան բարձրացման:
Այս մասին երէկ` մամլոյ ասուլիսի ժամանակ, «Արցախբրէս»ի թղթակիցի հարցումին ի պատասխան` ըսած է ԼՂՀ վարչապետ Արայիկ Յարութիւնեան, նշելով, որ ծախսերը կատարուած են նաեւ արտապիւրճէտային այլ միջոցներու հաշւոյն, որոնք պիտի վերականգնեն ժամանակի ընթացքին:
«Հաւաքագրուած գումարից մօտ 2 միլիարդ դրամ մենք ուղղել ենք կամաւորների եւ զօրակոչուածների փոխհատուցումների տրամադրմանը, սոցիալական խնդիրների լուծմանը եւ այլ կարիքները հոգալուն, իսկ մնացածը ուղղուել է առաջնագծին: Ուզում եմ նաեւ ընդգծել, որ կառավարութիւնն իր գործունէութիւնը չի ծաւալել միայն արտապիւտճէտային միջոցների հաշուին: Նախագահը միշտ էլ դրական է արձագանգել պաշտպանութեանը վերաբերող հարցերին: Պիւտճէում մենք քիչ ենք ընդգծում ծախսերը, բայց բնակարանների տրամադրման, ենթակառուցուածքների ամրացման, սոցիալական խնդիրների լուծման ծրագրերի համար երբեմն չնախատեսուած գումարներ էլ ենք յատկացնում բանակին»,- ըսած է Ա. Յարութիւնեան:
Անդրադառնալով առաջնագիծի վրայ տեսանկարահանող եւ ժամանակակից սարքերու տեղադրման, ԼՂՀ վարչապետն ընդգծած է, որ բոլոր միջոցառումները պիտի իրականացուին զինուորներու անվտանգութեան աստիճանի բարձրացման, դիտարկման կարողութիւններու բարելաւման, ինչպէս նաեւ հակառակորդին ոտնձգութիւններու փորձերը ժամանակին կասեցնելու համար:
«Ժամանակակից սարքերի տեղադրման աշխատանքներն սկսուել են շատ աւելի շուտ` 2014 թուականի օգոստոսեան դէպքերից յետոյ: Առաջին փուլում արտապիւտճէտային եւ մեր անձնական միջոցների հաշուին լուծել ենք առկայ խնդիրները, բայց ոչ այն չափով: Ապրիլեան դէպքերը մեզ յուշեցին, որ աշխատանքների ծաւալները պէտք է աւելացնենք: Մենք մեր բոլոր միջոցները ներդնում ենք բանակի մարտունակութեան բարձրացման համար»,- աւելցուցած է Ա. Յարութիւնեան:
