23.09c
Երեվան
շբթ, օգս 16
Հայաստանի Հանրապետութեան ազգային անվտանգութեան ծառայութեան աշխատակիցները յանցաւորութեան դէմ պայքարին ուղղուած գործառոյթներու իրականացման ծիրէն ներս ՀՀ Քր. օրէնսգիրքի 235-րդ յօդուածի 2-րդ մասի յատկանիշներով յարուցուած քրէական գործով 16 յունիսին խուզարկութիւն իրականացուցած է ՀՀ Արմաւիրի մարզի Արշալոյս գիւղի Լճափնեայ փողոցի մէջ գտնուող զօրավար (կեներալ) Մանուէլ Գրիգորեանին սեփականութեան իրաւունքով պատկանող հանգստեան գօտիին մէջ, ինչպէս նաեւ Էջմիածին քաղաքի Ալաւերտեան փողոցի տուն 46 հասցէին վրայ տեղակայուած վերջինիս պատկանող առանձնատանը:
ԱԱԾ մամուլի կեդրոնէն NEWS.am-ին յայտնած են, որ Մանուէլ Գրիգորեանին պատկանող հանգստեան գօտին վերածուած էր զինապահեստի, ռեթրօ եւ ժամանակակից տասնեակ ինքնաշարժներու կառատան: Ակնալիճի ամառանոցը զօրավարին համար ծառայած է նաեւ «զինուորի բաժին» նշագրումով սնունդի, առողջապահական պարագաներու, դեղորայքի, զինուորական հանդերձանքի պահեստարանի: Զինուորներուն հասցէագրուած արկղերուն կից նամակներէն ակնյայտ էր, որ արկղերու պարունակութիւնը 2016-ին ապրիլեան քառօրեայ պատերազմի օրերուն առաջնագիծի զինուորներուն ուղարկուած օգնութիւնն էր:
Զինուորական շապիկներ, գուլպաներ, դեղորայք, վիրակապեր, դեղահապեր… թէ ինչու այս ամէնը յայտնուած էր Արցախի հերոսի Ակնալիճի հանգստեան գօտիին մէջ, կը պարզէ Ազգային անվտանգութեան ծառայութեան քննչական վարչութիւնը:
Հանրապետութեան տասնեակ մանկապարտէզներէն, դպրոցներէն, համայնքներէն զինուորներուն ուղարկուած սնունդը՝ խտացուած կաթ, մաքարոնեղէն, լոլիկի մածուկ, պահածոյացուած միս եւ բանջարեղէն, նոյնիսկ առողջապահական պարագաներ, զուգարանի թուղթ, նոյնպէս պահեստաւորուած էին հանգստեան գօտիի պահեստներուն մէջ: Խուզարկութեամբ յայտնաբերուած են նաեւ պաշտպանութեան նախարարութեան մատակարարուած «զինուորի համար» յատուկ գրութեամբ մթերքներ, որոնք ենթակայ չեն վաճառքի կամ այլ կարիքներու համար օգտագործման:
Ուշագրաւ է նաեւ Մանուէլ Գրիգորեանին պատկանող տարածքին մէջ յայտնաբերուած եւ առգրաւուած ռազմամթերքը:
Ուշագրաւ էր նաեւ այն, որ յայտնաբերուած է նաեւ ապրիլեան քառօրեայ պատերազմի օրերուն պաշտպանութեան բանակի համար նախատեսուած ամենագնացներու շարք, շտապօգնութեան մեքենայ: Անոննք պաշտպանութեան բանակին նուիրաբերած էին Ռուսաստանի հայ համայնքի ներկայացուցիչները, որոնք Մ. Գրիգորեանը ձեւակերպած է իր բարեկամներու անուններով եւ տեղափոխած իր սեփական կառատուն:
ԱԺ պատգամաւորը հանգստեան տան մէջ ունի նաեւ սեփական կենդանաբանական այգի, ուր կը պահուին վագր, արջեր, ջայլամներ, կայ ձիարշաւարան: Ստացուած տուեալներու հիման վրայ պարզ դարձած է, որ ապրիլեան քառօրեայ պատերազմի մասնակից զինուորներու համար նախատեսուած սնունդը Մանուէլ Գրիգորեանն օգտագործած է սեփական կենդանաբանական այգիի կենդանիները կերակրելու նպատակով:
