22.09c
Երեվան
ուրբ, մյս 01
Եւրոպական Միութիւնը ողջունած է օրերս Կարսի մէջ տեղի ունեցած Հայաստան-Թուրքիա երկկողմ աշխատանքային խումբի նիստը, որ նուիրուած է երկու երկիրներու միջեւ երկաթուղային հաղորդակցութեան վերականգնման։
Հայ-թրքական յարաբերութիւններու կարգաւորման գործընթացին կայուն ընթացքը կ՚արտացոլէ տարածաշրջանին մէջ նկատուող աւելի լայն դրական զարգացումները, որոնք կարեւոր նշանակութիւն ունին տեւական խաղաղութեան եւ կայունութեան համար։ ԵՄ-ը կը խրախուսէ երկու երկիրներուն միջեւ յարաբերութիւններու լիարժէք կարգաւորումը,– նշուած է յայտարարութեան մէջ։
Եւրոպական Միութենէն ընդգծած են, որ շահագործման յանձնուելէ ետք Կարս-Գիւմրի երկաթուղային հաղորդակցութիւնը պիտի ամրապնդէ տարածաշրջանային կապը եւ յստակ օգուտներ պիտի բերէ Հարաւային Կովկասի ամբողջ բնակչութեան։
ԵՄ-ը յանձնառու է Հարաւային Կովկասի մէջ կապերու զարգացման՝ միջտարածաշրջանային կապակցուածութեան օրակարգին, «Համաշխարհային դարպասներ» ռազմավարութեան եւ Անդրկասպեան փոխադրական միջանցքին համապատասխան, որոնց մէջ Հայաստանը եւ Թուրքիան առանցքային դեր կը խաղան,– նշուած է ԵՄ պատուիրակութեան անունով տարածուած հաղորդագրութեան մէջ։
