3.09c
Երեվան
երկ, դկտ 23
Հայաստանի Հանրապետութիւն ներկրուած է «Քորոնա» ժահրային հիւանդութեան (COVID-19) դէմ պատուաստանիւթի՝ «COVAX FACILITY» նախաձեռնութեան միջոցով առաջին խմբաքանակը՝ 24 հազար դեղաչափ: Այս մասին կը յայտնեն ՀՀ Առողջապահութեան նախարարութենէն:
Այն նախատեսուած է վտանգաւոր խումբերու, մասնաւորապէս՝ բուժաշխատողներու, 65 տարեկան եւ բարձր տարիքի անձանց, քրոնիկ հիւանդներու, տարեցներու խնամքի կեդրոններու բնակիչներու եւ աշխատակիցներու, ընկերային խնամքի կեդրոններու աշխատակիցներու, կամաւորութեան սկզբունքով, «Քորոնա» ժահրային հիւանդութեան (COVID-19) դէմ պատուաստելու համար: COVID-19-ի դէմ «AstraZeneca» ընկերութեան պատուաստանիւթը ձեռք բերուած է «COVAX FACILITY» նախաձեռնութեան շրջածիրէն ներս: «AstraZeneca» պատուաստանիւթն ունի Առողջապահութեան համաշխարհային կազմակերպութեան (ԱՀԿ) կողմէ արտակարգ իրավիճակներու մէջ կիրառման թոյլտուութիւն: Այն կիրառելի է 18 տարեկան եւ բարձր տարիքի անձանց համար:
Նկատենք, որ առողջապահութեան նախարարութեան գործադրած ջանքներու եւ բանակցութիւններու շնորհիւ, հնարաւոր եղաւ պատուաստանիւթի առաջին խմբաքանակը ստանալ նախանշուած ժամկէտներու մէջ: Հայաստանն այն բացառիկ երկիրներէն է, որ հնարաւորութիւն ստացած է ձեռք բերել երկար սպասուած պատուաստանիւթը, երբ այսօր աշխարհի մէջ շարք մը երկրներ դեռ կը պայքարին այդ իրաւունքի համար:
Նշենք, որ «Քորոնա» ժահրային հիւանդութեան (COVID-19) համավարակի կանխարգելման գործընթացին մէջ առանցքային դեր ունի պատուաստանիւթի կիրառումը: Իսկ ներկրուած պատուաստանիւթի արդիւնաւէտութեան եւ անվտանգութեան տուեալները կը համապատասխանեն ԱՀԿ-ի կողմէ սահմանուած չափանիշներուն: Հարկ է նշել, որ ԱՄՆ-ի մէջ «AstraZeneca-ի քլինիքական փորձարկման 3-րդ փուլի վերաբերեալ վերջին յայտարարութեան (03/25/2021) համաձայն, պատուաստանիւթը կ'ապահովէ՝ ախտանշանային COVID-19-ի կանխարգելում` 76% արդիւնաւէտութիւն, հիւանդութեան ծանր կամ ծայրայեղ ծանր դէպքերու եւ հիւանդանոց տեղափոխման կանխարգելում՝ 100% արդիւնաւէտութիւն, 65 տարեկան եւ բարձր տարիքի անձանց մօտ ախտանշանային COVID-19-ի կանխարգելում՝ 85% արդիւնաւէտութիւն։
Յիշեցնենք, որ Հայաստանի Հանրապետութեան մէջ պատուաստումները կ'իրականացուին բացառապէս կամաւորութեան սկզբունքով:
