5.09c
Երեվան
ուրբ, փտր 20
Մարտի 24-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ռուսաստանի Դաշնութեան Մուրմանսկի նահանգապետ Անդրեյ Չիբիսի գլխաւորած պատուիրակութեանը:
Զրոյցի ընթացքում Նորին Սրբութիւնը գոհունակութեամբ արձանագրեց, որ երկու ժողովուրդների եղբայրական յարաբերութիւններն ունեն դարաւոր պատմութիւն, եւ նմանօրինակ այցելութիւնները նպաստում են երկու երկրների բարեկամական կապերի եւ գործակցութեան առաւել զօրացմանը: Հայոց Հայրապետն ընդգծեց, որ բարեկամ ժողովուրդները դարերի ընթացքում կողք կողքի, միասնաբար կարողացել են դիմակայել եւ յաղթահարել բազում փորձութիւններ ու դժուարութիւններ:
Հանդիպմանը Նորին Սրբութիւնն անդրադարձ կատարեց նաեւ Հայաստանեայց Առաքելական եւ Ռուս Ուղղափառ եկեղեցիների միջեւ առկայ ջերմ յարաբերութիւններին եւ արդիւնաւէտ փոխգործակցութեանը` երախտագիտութեամբ արձանագրելով այն ջանքերը, որ Մոսկուայի եւ Համայն Ռուսիոյ Կիրիլ Պատրիարքի կողմից վերջին տարիներին ներդրուել են ղարաբաղեան հակամարտութեան խաղաղ կարգաւորման եւ հայկական հոգեւոր ժառանգութեան անխաթար պահպանման ուղղութեամբ:
Իր հերթին Մուրմանսկի նահանգապետ Անդրեյ Չիբիսը, կարեւորելով հայ-ռուսական յարաբերութիւնների էլ աւելի խորացումն ու զարգացումը, իր շնորհակալութիւնը յայտնեց Նորին Սրբութեանը երկու ժողովուրդների բարեկամական կապերի ամրապնդման գործում Հայոց Եկեղեցու կարեւոր ներդրումի համար: Նահանգապետը Ամենայն Հայոց Կաթողիկոսին ներկայացրեց նաեւ Մուրմանսկի մարզը եւ վերջինիս ձեռքբերումները տարբեր ոլորտներում` կարեւորելով տեղի հայ համայնքի ակտիւ դերակատարութիւնը:
Հանդիպմանն անդրադարձ կատարուեց երկու երկրների առջեւ ծառացած ներկայիս մարտահրաւէրներին եւ առկայ մտահոգութիւններին:
