17.09c
Երեվան
չրք, ապր 29
Ռամկավար Ազատական Կուսակցութեան անդամներ «Վերականգնումի շարժում»ի յառաջիկայ գործունէութեան մասին հաղորդագրութիւն մը հրապարակած են: Հաղորդագրութեան մէջ այլ խնդիրներու կողքին նախաձեռնողները ՌԱԿ Կեդրոնական Վարչութիւնէն կը պահանջեն վերացնել անտեսումի քաղաքականութիւնը իրենց նկատմամբ, վստահեցնելով նաեւ, որ իրենք պիտի շարունակեն իրենց աշխատանքները: Անոնք նաեւ կը յայտնեն, թէ յառաջիկայ ապրիլին Երեւանի մէջ պիտի գումարեն վերականգնումի մարմնին Բ ժողովը, որուն ընթացքին սփիւռքի տարբեր գաղութներէն ժողովին մասնակցող պատասխանատուները պիտի քննարկեն եւ ներկայացնեն իրենց յառաջիկայի ընելիքներուն ընդհանուր ճանապարհային քարտէզը: Նախանձախնդիր ըլլալով մամուլի եւ խօսքի ազատութեան ըմբռնումներուն՝ մեր կայքը իր ամպիոնին մէջ տեղ կու տայ նաեւ սոյն յայտարարութեան: Մեզի համար գերագոյն արժէք կը ներկայացնեն գործող հայ աւանդական երեք կուսակցութիւնները եւ հաւատացողն ենք, որ բոլոր տարակարծութիւնները թօթափելով, ՌԱԿ-ը, ինչպէս մօտիկ անցեալին, այսօր եւս իր արժանի եւ ուրոյն դերը պիտի վերստանձնէ Սփիւռքի եւ Հայաստանի ազգային – քաղաքական բեմերուն վրայ:
Ստորեւ հրապարակուած հաղորդագրութիւնը
ՌԱԿ-ի Վերականգնումի Շարժումի Յայտարարութիւնը
Ատենին եւ պաշտօնական յայտարարութեամբ հայ հասարակութեան ընդհանրապէս եւ ՌԱԿ-ի շարքայիններուն մասնաւորաբար իրազէկ դարձուցած էինք այն ժողովէն որ գումարուեցաւ Երեւանի մէջ, Հոկտեմբեր 31-ին: Այդ ժողովը կը նպատակադրէր ՌԱԿ-ը դուրս բերել իր քսան տարուան պառակտուած վիճակէն եւ կարելի ամէն ջանք թափել կասեցնելու համար այսօրուան դրութեամբ անոր արձանագրած քայքայումը եւ հուսկ՝ ի մի հաւաքելով ուժերը, անցնիլ զայն վերականգնելու:
Այս ժողովէն երեքուկէս ամիս ետք եւ այդ ժամանակամիջոցին տարուած հետեւողական աշխատանքին լոյսին տակ կարելի է գոհունակութեամբ բացայայտել շրջաններու եւ ընկեր-ընկերուհիներու կողմէ դրսեւորուած առհասարակ դրական արձագանգը, բայց միաժամանակ, ցաւով ընդգծել իր օրինականութիւնը սպառած Կեդրոնական Վարչութեան կողմէ արձանագրուած խիստ ժխտական կեցուածքները եւ ձգձգումի մարտավարութիւնը, արհամարհելով միասնականութեան ամէն ձգտում եւ վերականգնումի միտում:
Մեկնելով վերոնշեալէն եւ շրջանցելով ամէն տեսակի խոչընդոտ միաժամանակ՝ մեր համոզումին վրայ աւելցնելով միասնականութեան վերահաստատման եւ ՌԱԿ-ի վերականգնումին միտող այս շարժումին հանդէպ բազմաթիւ ընկեր-ընկերուհիներու ցուցաբերած վստահութիւնը, այսօր առաւել եւս զօրացած ու ինքնավստահ կերպով կը վերահաստատենք մեր յանձնառութիւնը՝ ՌԱԿ-ի ազգային առաքելութիւնը իր ճիշդ հունին վերադարձնելու մտահոգութեան նկատմամբ, հետեւաբար, եւ մեկնելով այդ բոլորէն կ'արձանագրենք հետեւեալ որոշումները.-
Ա. Մինչեւ վերացումը ՌԱԿ-ի միասնականութեան վերահաստատման եւ անոր վերականգնումին նկատմամբ ցարդ իր օրինականութիւնը սպառած Կեդրոնական Վարչութեան կողմէ արձանագրուած արհամարհական կեցուածքներուն եւ դրսեւորուած անտեսումին, շարունակել մեր աշխատանքը:
Բ. Ապրիլ ամսուան 19-20, Երեւանի մէջ կայացնել վերականգնումի շարժման Բ. Ժողովը մասնակցութեամբ կուսակցութեան ազգային անխարդախ առաքելութեան հաւատացող եւ հետեւաբար՝ իր Հիմնադիրներուն կողմէ ճշդուած ՌԱԿ-ի ազգային ուղիին վերադառնալը անյետաձգելի անհրաժեշտութիւն համարող շարքայիններուն:
Գ. Այս Ժողովին կը քննարկուին ՌԱԿ-ի միասնականութեան եւ անոր վերականգնումին հետ կապ ունեցող հարցերը եւ այդ առնչութեամբ առնուած որոշումներուն գործնականացումը կը վստահուի այս ժողովին կողմէ ընտրուած համապատասխան մարմնի մը:
Կցուած, անգլերէն շարադրութեամբ կատարուած յայտարարութեան մէջ մանրամասնուած, վերականգնումի այս լուրջ աշխատանքներու արդիւնքները, պիտի պահանջուի օրակարգի գլխաւոր նիւթը նկատուիլ, յառաջիկայ ՌԱԿ-եան Ընտհանուր Ժողովին, որ պարտի հրաւիրուիլ կանոնաւոր կերպով եւ բոլորի մասնակցութեամբ, գործնականացնելու համար կուսակցութեան իսկական վերամիացումը:
Խոր համոզումով կը նպատակադրենք վերստին կեանքի կոչել կուսակցութեան աւանդական դերը սփիւռքի մէջ աշխատանքի մղելով արտերկրի մեր շարքայիններն ու լուռ մեծամասնութիւնը անմիջական եւ ամբողջական գործակցութիւնն ունենալով Հայաստանի Ռամկավար Ազատական Կուսակցութեան հետ, որպէսզի ցայտուն դարձնենք եւ տարածենք մեր գաղափարախօսութեան խորքը եւ անոր համախոհ եղող կառոյցներուն հետ միասնաբար գործի անցնինք ի խնդիր սփիւռքի ազգապահպանման եւ ի սատար Հայաստանին:
16 Փետրուար 2016
ՌԱԿ Վերականգնումի Յանձնախումբ՝
Էտմոն Ազատեան
Տոքթ.Գէորգ Երզնկացեան
Դոկտ. Հրաչ Գումրուեան
Արտաւազդ Մելքիսէթեան
Յակոբ Վարդիվառեան
Համադրող՝ Վարդան Նազիրեան
