16.09c
Երեվան
հնգ, հկտ 15
Ամերիկեան ուժեր հրթիռային յարձակում մը գործած են Սուրիոյ բանակին պատկանող զինուորական օդակայանի մը դէմ: Այս մասին լուրը փոխանցեց «Ռօյթըրզ» լրատուական գործակալութիւնը նշելով, որ հինգշաբաթի ուշ գիշերին Tomahawk տիպի 59 հրթիռներ արձակուած են Հոմս քաղաքի «Շըհիրաթ» զինուորական օդակայանին ուղղութեամբ:
Հոմսի քաղաքապետը, որ դէպքէն ետք խօսած է «Ալ Մայատին» կայանին յայտնած է, թէ յարձակումէն ետք մեծ հրդեհ մը ծագած է օդակայանին մէջ եւ հրշէջ մեքենաներ ուղղուած են դէպքի վայր: Քաղաքապետը նաեւ ըսած է, որ ամերիկեան ուժերուն թիրախ դարձած օդակայանը կարեւոր դեր ունեցած է ահաբեկչական խմբաւորումներուն դէմ մղուած պատերազմին մէջ:
Հոմսի քաղաքապետը նշած է, որ գրոհին հետեւանքով մարդկային տոյժեր չկան, սակայն նիւթական վնասները մեծ են:
Ըստ CNN-ի այս գրոհը տեղի ունեցած է առ ի պատասխան Իտլիպ քաղաքին մէջ կատարուած քիմիական յարձակման, որ ըստ ամերիկայի պաշտօնական կարծիքին կատարուած է Սուրիոյ իշխանութիւններուն ձեռամբ:
