32.09c
Երեվան
երք, հլս 15
Ռամկավար Ազատական Կուսակցութեան (ՌԱԿ) Կեդրոնական Վարչութեան անդամ Տոքթ. Աւետիս Տագէսեան օրերս հանդիպում մը ունեցած է Մեծի Տանն Կիլիկիոյ Ն.Ս.Օ.Տ.Տ. Արամ Ա. Կաթողիկոսին հետ։
Հանդիպման մասին «Արեւելք» տեղեկացաւ «Կիլիկիա» հարթակէն։
Ստորեւ տրուած հաղորդագրութիւնը՝
Այս առաւօտ՝ Երկուշաբթի, 14 Յուլիս 2025-ին, Պիքֆայայի Սուրբ Աստուածածին Վանքին մէջ, Ն.Ս.Օ.Տ.Տ. Արամ Ա. Վեհափառ Հայրապետը հանդիպում ունեցաւ Ռամկավար Ազատական Կուսակցութեան (Ռ.Ա.Կ.) Կեդրոնական Վարչութեան անդամ տոքթ. Աւետիս Տագէսեանի հետ:
Հանդիպման գլխաւոր առանցքը, բնականաբար, Հայաստանէն ներս ստեղծուած տագնապալից կացութիւնն էր: Տոքթ. Տագէսեան ջերմօրէն ողջունեց Վեհափառ Հայրապետին կատարած աշխատանքները՝ մեղմացնելու ներհայաստանեան վատառողջ մթնոլորտը, որպէսզի կարելի ըլլայ հարցերու լուծման առաջնորդող ճամբաներ գտնել: Միաժամանակ, ան առաջարկեց Նորին Սրբութեան շարունակել իր ճիգերը, հակառակ գոյութիւն ունեցող դժուարութիւններուն:
Վեհափառ Հայրապետը, իր կարգին, տոքթ. Տագէսեանին պարզեց իր մօտեցումները եւ շեշտեց մեր ժողովուրդին ներքին միասնակամութիւնը ամուր պահելու հրամայականը:
Յայտնենք, որ հակառակ գոյութիւն ունեցող շարք մը դժուարութիւններու, Վեհափառ Հայրապետը պիտի շարունակէ իր աշխատանքները՝ ի խնդիր Հայաստանի պետութեան ու եկեղեցւոյ միջեւ գոյութիւն ունեցող խնդիրներու կարգաւորման, ինչպէս նաեւ այլ առկայ հարցերու լուծման:
