Պրազիլիոյ մէջ. Գերշ. Տ. Նարեկ եպս. Պէրպէրեանի ձեռամբ՝ Դպրաց Ձեռնադրութիւն (Լուսանկարներ)

  Պրազիլիոյ մէջ. Գերշ. Տ. Նարեկ եպս. Պէրպէրեանի ձեռամբ՝ Դպրաց Ձեռնադրութիւն (Լուսանկարներ)

Օրերս Պրազիլիոյ Ս. Գէորգ մայր տաճարին մէջ տեղի ունեցած է դպրաց ձեռնադրութիւն ձեռամբ՝ Պրազիլիոյ Հայոց Թեմի առաջնորդ Գերշ. Տ. Նարեկ եպս. Պէրպէրեանի: Այս մասին «Արեւելք» տեղեկացաւ թեմի դիմատետրեան էջէն, ուր մասնաւորապէս գրուած է: 

«Այսօր, Պրազիլիոյ Հայոց Թեմի Սուրբ Գէորգ մայր տաճարին մէջ՝ ձեռամբ թեմակալ առաջնորդ Գրշ. Տ. Նարեկ եպս. Պէրպէրեանի կատարուեցաւ դպրաց ձեռնադրութիւն:

Ձեռնադրութեան խորհուրդին արժանացան սուրբ Գէորգ մայր եկեղեցւոյ խորանին իրենց սպասաւորութիւնը բերող երեք երիտասարդներ՝ Վահրամ Գասպարեան, Ֆելիփէ Մաւուշեան, Դրօ Գալայճեան:

Յաւարտ ձեռնադրութեան, սրբազան հայրը շնորհաւորեց դպիրները՝ պատգամելով, որ նոր շունչով եւ նոր աշխութեամբ շարունակեն իրենց հոգեւոր ծառայութիւնը եկեղեցւոյն եւ անոր ժողովուրդին:

Աստուած ամուր պահէ ձեզ, սիրելի՛ դպիրներ, բարի օրինակ ըլլաք մեր համայնքի միւս երիտասարդներուն համար, Տիրոջ Սուրբ Աջը պահապան ըլլայ ձեզի եւ ձեր կոչման,- ըսաւ սրբազանը իր խօսքին մէջ:»