4.09c
Երեվան
շբթ, նմբ 14
Միացեալ Նահանգներու օդային երթեւեկութեան կառավարման համակարգին մէջ տեղի ունեցած խափանումը պատճառ դարձած է չուերթներու զանգուածային ուշացումներու եւ չեղարկումներու, որոնց հետեւանքով շուրջ 1.5 միլիոն ուղեւոր չէ կրցած ժամանակին ճամբայ ելլել։ Այս մասին կը հաղորդէ CNN-ը։
Խափանումը սկսած է Ուրբաթ՝ Նոյեմբեր 13-ին, ԱՄՆ-ի արեւելեան ժամանակով ժամը 15։45-ի շուրջ։ Միացեալ Նահանգներու Դաշնային օդային երթեւեկութեան վարչութիւնը (FAA), հեռահաղորդակցութեան համակարգին խափանման պատճառով, տեղական ժամանակով ժամը 15։54-ին յայտարարած է ամբողջ երկրին մէջ օդանաւերու թռիչքներու ժամանակաւոր դադրեցման մասին։ Սահմանափակումները վերացուած են ժամը 20։15-ի շուրջ։
Ըստ Cirium վերլուծական ընկերութեան տուեալներուն՝ սահմանափակումները տեւած են աւելի քան չորս ժամ։ Ժամանակաւոր արգելքի վերացումէն ետք իշխանութիւնները արտօնած են վերսկսիլ ներքին չուերթները։
ԱՄՆ-ի փոխադրութեան նախարար Շոն Տաֆի յայտարարած է, որ միջադէպին պատճառ դարձած են օդային երթեւեկութեան կառավարման հնացած արհեստագիտութիւնները եւ հեռահաղորդակցութեան համակարգի խափանման հետեւանքով գերծանրաբեռնուած ուղղորդիչ սարքերը։ Ան նախազգուշացուցած է, որ օդային փոխադրումներու բնականոն աշխատանքին վերականգնումը ժամանակ պիտի պահանջէ, եւ Քոնկրեսին կոչ ուղղած է յատկացնել անհրաժեշտ միջոցները ենթակառոյցներու արդիականացման համար։
Միաժամանակ Տաֆի յոյս յայտնած է, որ այս կացութիւնը պիտի չազդէ օդային փոխադրումներուն վրայ՝ Գոհաբանութեան տօնին ընդառաջ, որ Միացեալ Նահանգներու մէջ կը նշուի Նոյեմբերի վերջը։
Ներքին անվտանգութեան նախարար Մարքուեյն Մալլին ընդգծած է, որ միջադէպը կապուած չէ ազգային անվտանգութեան որեւէ սպառնալիքի հետ եւ առնչութիւն չունի այս շաբաթուան սկիզբը տեղի ունեցած՝ Microsoft-ի լայնածաւալ խափանումին հետ։
