24.09c
Երեվան
ուրբ, հնս 27
ՄԱԿ-ի անվտանգութեան խորհուրդը 9 յունուարին միաձայն բանաձեւ ընդունած է Սուրիոյ անդրսահմանային օգնութեան մեքանիզմի գործունէութիւնը վեց ամսով երկարաձգելու մասին: «Արմէնփրէս»-ի հաղորդմամբ՝ այս մասին յայտնած է ԹԱՍՍ-ը։
Ընդունուած որոշմամբ պիտի երկարաձգուի 2022 թուականի 12 յուլիսին ընդունուած անդրսահմանային աջակցութեան մեքանիզմի մասին որոշումը։ Այն ուժի մէջ կը պահէ «Պապ ալ-Հաուա» անդրսահմանային օգնութեան միակ անցակէտի շահագործումը Սուրիոյ եւ Թուրքիոյ սահմանին։
Ըստ բանաձեւի՝ ՄԱԿ-ի գլխաւոր քարտուղարը պէտք է յատուկ զեկոյց ներկայացնէ Սուրիոյ մէջ մարդասիրական կարիքներու վերաբերեալ ոչ ուշ, քան 10 յունիսը։
Ի տարբերութիւն աջակցութեան մեքանիզմի վերաբերեալ նախկին փաստաթուղթերու՝ ներկայիս բնագիրը չի պարունակեր միջանցքի շահագործումը վեցամսեայ ժամկէտի աւարտէն ետք եւս վեց ամսով երկարաձգելու դրոյթ:
ՄԱԿ-ի գլխաւոր քարտուղարի խօսնակ Ստեֆան Տիւժարիքը ըսած է, որ համաշխարհային կազմակերպութիւնը յանձնառու է օգտագործել բոլոր հնարաւորութիւնները՝ օգնութիւն ցուցաբերելու «ամենաանվտանգ եւ ամենաարդիւնաւէտ ուղիներով»:
