6.4c
Երեվան
երկ, ապր 13
Արմաւիրի մարզին մէջ, 22 ապրիլին, կրակոցներ հնչած են. Էջմիածին քաղաքի Զուարթնոց թաղամասին մէջ Օստրովսկիի փողոցի տուներէն մէկուն մօտ զինուած քաղաքացին մէկ հոգի դանակահարած է ու սպառնացած է, որ կը վիրաւորէ անոր հարազատները։
Այս մասին Ժամը 01։30-ի սահմաններուն ահազանգ ստացած է Ոստիկանութեան Էջմիածնի բաժինը:
Shamshyan.com-ի հաղորդմամբ, ոստիկանները պարզած են, որ նշուած վայրէն դանակահարուած վիճակի մէջ «Վաղարշապատ» բժշկական կեդրոն տեղափոխուած է 60-ամեայ Տիտալ Սլոյեանը։
Մինչ բժիշկները կը պայքարէին վիրաւորի կեանքի համար Էջմիածնի ոստիկանները պարզած են, որ Տ․ Սլոյեանին դանակահարած է անոր ազգականը՝ 41-ամեայ Ազիզ Սլոյեանը։
Ոստիկանութեան Էջմիածնի բաժնի դաշտային խումբը մեկնած է դէպքի վայր ուր ալ անոնց ուղղութեամբ ինքնաձիգէն կրակոցներ հնչած են։ Այդ մասին տեղեկանալով կրակոցներու վայր ժամանած է Ոստիկանութեան Արմաւիրի մարզային վարչութեան խումբը:
Ոստիկանները սկսած են Ա․ Սլոյեանի հետ բանակցութիւններ վարել, որ ան վար դնէ զէնքը եւ ինքնակամ յանձնուի, սակայն ան շարունակած է կրակել, ապա պահ մը դադար տալէ ետք անգամ մըն ալ կրակած է:
Անկէ ետք ոստիկանները մօտեցած են կրակոցներու ուղղութեամբ, ուր ալ «ստորին ծնոտի հրազէնային վիրաւորումով» յայտնաբերած են Ա․ Սլոյեանը։
Ա․ Սլոյեանը տեղափոխուած է հիւանդանոց։
Ոստիկաններն ու քննիչները դէպքի վայրին մէջ յայտնաբերած են յանցագործութեան գործիք ինքնաձիգը, կրակուած պարկուճներ, վնասուած վիճակի մէջ Mercedes մակնիշի մեքենայ, արնանման հետքեր։
