4.09c
Երեվան
երկ, դկտ 02
Չորեքշաբթի երեկոյեան հազարաւոր իսրայէլցիներ դուրս եկած են փողոցներ եւ փակած երկրի քանի մը հիմնական մայրուղիներ, երբ Թէլ Աւիւի ոստիկանապետ Ամիչայ Էշետը յայտարարեց իր հրաժարականի մասին: Պաշտօնեան հրաժարած էր «անհամաչափ ուժ» կիրառել մարտէն ի վեր պարբերաբար տեղի ունեցող ցոյցերու մասնակիցներու նկատմամբ, որ կը վկայէր վարչապետ Բենիամին Նաթանիահուի նախաձեռնած դատական բարեփոխումներու դէմ բողոքող ցուցարարներու նկատմամբ մեղմ վերաբերմունքի մասին։
Ինչպէս գրած է timesofisrael.com-ը, ամենամեծ ցոյցը` ի համերաշխութիւն Էշետի եւ ընդդէմ իշխանական դաշինքի, տեղի ունեցած է Թէլ Աւիւի Այալոն մայրուղիին վրայ, ուր ոստիկանութիւնը բախած է երթեւեկութիւնը փակող եւ ճանապարհին կրակ վառող ցուցարարներու հետ:
Ճանապարհը արգելափակուած է քանի մը ժամով, մինչ ոստիկանութիւնը ուժ կիրառած է կէսգիշերէն ետք ցուցարարները ցրելու համար: Ոստիկանութիւնը հեծեալ սպաներ եւ ջրցան մեքենաներ տեղակայած է մայրուղին մաքրելու համար: Անոնք քանի մը ժամ պայքարած են կարգուկանոնը վերականգնելու համար:
Չորեքշաբթի կէսգիշերէն ետք ոստիկանութիւնը յայտնած է, որ Այալոն մայրուղին ազատած է ցուցարարներու մեծ մասէն եւ ձերբակալած 15 մարդ:
Աւելի վաղ ցուցարարները հաւաքուած էին Երուսաղէմի Ազզա փողոցին մէջ Նաթանիահուի պաշտօնական նստավայրի մօտ՝ բախելով ոստիկաններու հետ: Ուշ գիշեր ցուցարարները կրկին շարժած են դէպի վարչապետի տուն։
Յիշեցնենք, որ գարնան Իսրայէլի վարչապետ Բենիամին Նաթանիահուն յայտարարած է, որ մինչեւ ամառ կը կասեցնէ դատական բարեփոխումները, որոնց նախաձեռնումը յանգեցուցած է զանգուածային բողոքի ցոյցերու եւ բարձրաստիճան պաշտօնեաներու հրաժարականներու:
Դատական բարեփոխումները իրականացուելու պարագային խորհրդարանական մեծամասնութիւնը վերահսկողութիւն ձեռք պիտի բերէ Գերագոյն դատարանի ձեւաւորման վրայ, ինչպէս նաեւ պիտի կարողանայ յաղթահարել դատական վեթօն։ Երկրի հարիւր հազարաւոր բնակիչներ համաձայն չեն այս փոփոխութիւններու հետ:
