Երեւանի մէջ. Մահացած է՝ Հարպիկ Քէչէպաշեանը

  Երեւանի մէջ. Մահացած է՝ Հարպիկ Քէչէպաշեանը

Ցեղասպանութեան արհաւիրքէն ճողոպրած արեւմտեան Հայաստանի ամենատարբեր շէներէն ու քաղաքներէն Պէյրութ հասած մեր հայրենակիցները կարողացան ամփոփուիլ ու քով-քովի գալ ու ստեղծել իրենց թաղերը։ 

 Բնիկ սսեցի մեր հայրենակիցներուն այդ մէջ յաջողոեցաւ կատարել Պուրճ Համուտի հարեւանութեամբ գտնուող թաղամասերուն մէջ, որ վերակոչուեցան ու յայտնի դարձան, որպէս «Քէմբ Սիս», իսկ աւելի վերջ ալ «Նոր Սիս»։

Այդ շրջաններու իսկական պահապաններէն կը համարուին Քէչէպաշեանները, որոնց երիցագոյն ներկայացուցիչներէն մին՝ Հարպիկ Քէչէպաշեանը օրերս Երեւանի մէջ կնքեց իր մահկանացուն, այդպիսով ալ փակելով ոսկեայ էջ մը սփիւռքի տարբեր անկիւններուն վրայ զարկ տրուած հայապահպանութեան գործին։

 Ուրախալին այն է, որ հանգուցեալի զաւակները անտեսելով ամէն դժուարութիւն հաստատուեցան ու կապրին Երեւանի մէջ։

 

Երեւանի մէջ յետ կարճատեւ հիւանդութեան իր մահկանացուն կնքած է Հարպիկ Քէչէպաշեանը։

 Իր աչքերը Պէյրութի Սիս շրջանին մէջ բացած Հարպիկ Քէչէպաշեան սիրուած եւ յարգուած անձնաւորութիւն էր։ 

 Ամբողջ կեանք մը նուիրումի եւ աշխատասիրութեան, ինչպէս նաեւ մշտական ներկայութիւն մը գաղութային եւ թաղային իմաստով Պրն. Հարպիկը տքնաջան ճիգերու շնորհիւ կարողացած էր 80-ականներուն հիմնել Սիս շրջանի ամէնայայտնի նպառատուներէն մին, որ նաեւ ճանչցուած էր իր անունով ՝«Հարպիկ»։ Ու այսպէս տարուէ տարի շահելով հանրութեան վստահութիւնը , այդ վաճառատուն կը դառնար մակնիշ եւ հոն կը փութային շրջանին բոլոր խաւերուն պատկանող քաղաքացիները։

 Վերջին տարիներուն, ան իր ընտանիքին առաջնորդութեամբ կը փոխադրուէր Երեւան եւ յետ կարճատեւ հիւանդութեան 84 տարեկան հասակին յաւերժին համար կը փակէր իր աչքերը։

 Հանգուցեալի վերջին հրաժեշտի, յուղարկաւորութեան եւ թաղման արարողութիւնը պիտի կատարուին այսօր՝ չորեքշաբթի Երեւանի Մալաթիա շրջանի սուրբ Աստուածածին եկեղեցւոյ մէջ, ուրկէ անոր մարմինը պիտի փոխադրուի Սովետաշէնի գերեզմանատուն։

 

 «Արեւելք»  ցաւակցութիւն կը յայտնէ հանգուցեալի հարազատներուն եւ մասնաւորապէս անոր  քրոջորդիին Կիպրոսի Թեմի Կաթողիկոսական Փոխանորդ Գերշ. Տ. Խորէն արք. Տողրամաճեանին։