-0.91c
Երեվան
շբթ, դկտ 20
Հակաեկեղեցական հրոսակախումբը իր տխրահռչակ պարագլուխի բացայայտ հովանավորութեամբ դեկտեմբեր 18-ին կրկին ներխուժեց Մայր Աթոռ, փորձելով ասպատակել նուիրական սրբավայրը։ Այս մասին յայտարարութիւն տարածած են ԱԱԾ մեկուսարանին մէջ գտնուող Բագրատ եւ Արշակ Սրբազանները։
«Քստմնելի էր արշաւորդների առաջին շարքերում տեսնել տիրադաւութիւնն իրենց ճակատին որպէս աղուեսադրոշմ դաջած դեռեւս բարձրաստիճան հոգեւորականներին, որոնք ոստիկանական շարքերի ետեւում էին ծուարել՝ շփոթուած եւ շուարած հայեացքներով։
Ակնյայտ է, որ իրենք եւս հասկանում են, որ ընտրել են ինքնաոչնչացման եւ ինքնաժխտման ճանապարհը՝ խամաճիկ դառնալով խառնակիչ տիկնիկավարի ձեռքին, որը կարճ ժամանակ յետոյ իրենց եւս զոհաբերելու է ատելութեան եւ թշնամութեան իր արիւնածարաւ կուռքին։
Մայր տաճարի պատերը շատ ասպատակողների են տեսել՝ սա էլ տեսան (բոլորն էլ փոշիացել են) եւ այդ առումով դեկտեմբերի 18-ը կը մնայ մեր նորագոյն պատմութեան խայտառակ ու ամօթալի էջերից մէկը։
Այս ամօթալի պատկերի դիմաց առանձնակի հիացմունքով ենք անդրադառնում մեր ուխտապահ եկեղեցականներին եւ հաւատացեալ ժողովրդի խիզախ կեցուածքին, որը եւս մէկ անգամ փաստեց, որ հայ մարդու մէջ չի կարող սպանուել ինքնութեան զգացումը՝ անկախ հալածանքների սաստկութիւնից։
Մեր եւ կալանաւորուած մեր միւս հոգեւոր եղբայրների՝ Միքայէլ եւ Մկրտիչ սրբազանների անունից, մեր հաւատարմութիւնն ենք յայտնում Ամենայն Հայոց Հայրապետին եւ Լուսաւորչի գահին, եւ մեր զօրակցութիւնը զինուորեալ եւ նուիրեալ հոգեւոր դասին եւ ժողովրդին։ Առանձնակի ջերմութեամբ աղօթում ենք Տէր Վրթանես քհն․ Բաղալեանի շուտափոյթ ապաքինման համար։
Թող մեր տէրը անխախտ ու անսասան պահի Մայր աթոռ Սուրբ Էջմիածինը, մեր համբուրելի եւ խոցուած հայրենիքն ու ժողովրդին, որպէսզի մեր կեանքից մեկնի մէգը, մերժուի մառախուղը, վերանայ մութը, չքանայ չարիքը, հալածուեն յուսահատութիւնները եւ թագաւորի Տիրոջ ամենակարող ձեռքը»։
