0.09c
Երեվան
շբթ, դկտ 28
Ինչպէս աւելի վաղ «Արեւելք» լուսաբանած էր այս յառաջիկայ Յուլիս ամսուան ընթացքին Մեծի Տանն Կիլիկիոյ Կաթողիկոսութիւնը պիտի իրականացնէ Միւռոնօրհնէքի հոգեպարար արարողութիւն։
7 Տարին անգամ մը տեղի ունեցող այս արարողութեան ընդառաջ արդէն իսկ ընթացք առած են յատուկ արարողակարգեր, որոնց մասին ալ Կաթողիկոսութեան աղբիւրները կարճ լրատւութիւն մը ն ներկայացուցած են հանրութեան։
Ստորեւ ներկայացուած լրատւութիւնը.-
Կիրակի, 15 Մայիս 2022-ին, միաբան հայրեր եւ դպրեվանեցիներ կատարեցին երեկոյեան ժամերգութիւն եւ անդաստան, որմէ անմիջապէս ետք, միաբան հայրերով եւ դպրեվանեցիներով կազմուեցաւ Հայրապետական թափօր եւ ուղղուեցաւ Մայր Տաճարի կողքին, ուր նախագահութեամբ Ն.Ս.Օ.Տ.Տ. Արամ Ա. Վեհափառ Հայրապետին, սկիզբ առաւ Սրբալոյս Միւռոնի պատրաստութիւնը։
Տէրունական աղօթքէն ետք, Վեհափառ Հայրապետը աղօթք առաքեց առ Աստուած, որ Միւռոնը դառնայ օրհնութիւն եւ խաղաղաբեր Հայ Եկեղեցւոյ, Հայրենիքին, Սփիւռքին եւ ամբողջ աշխարհին համար։ Ապա, Հայրապետը Միւռոնի պատրաստութեան կաթսայի կրակը վառեց։ Նորին Ս. Օծութիւնը իր Հայրապետական խօսքը ուղղելով միաբան հայրերուն ու ներկաներուն՝ ըսաւ, թէ այս Սրբալոյս Միւռոնով եկեղեցւոյ սպասաւորներ պիտի օծուին, մանուկներ մկրտուին եւ հիւանդներ բժշկուին. աղօթող ենք, որ անիկա դառնայ բալասան հիւանդներուն եւ օրհնութիւն՝ հայ ազգին ու ժողովուրդին։
.png)
Յայտնենք, որ Սրբալոյս Միւռոնը կը պատրաստուի աւելի քան 40 բոյսերու ու ծաղիկներու հիւթերէ, որոնք միաբան հայրեր եւ դպրեվանեցիներ, զանոնք տեղադրեցին եփուելիք կաթսային մէջ։ Գլխաւորութեամբ Մայր Տաճարի լուսարարապետ Գերշ. Տ. Կոմիտաս Արք. Օհանեանի եւ մասնակցութեամբ միաբան հայրերու, Ս. Միւռոնը 48 ժամ անդադար եփուեցաւ աղօթքներով, սաղմոսասացութիւններով եւ աւետարանական ընթերցումներով։
Ապա, Ս. Միւռոնը եփուելէ ետք, Հայ Եկեղեցւոյ աւանդութեան համաձայն տեղադրուեցաւ Մայր Տաճարի Ս. Խորանին ձախակողմը։ 40 օրեր շարունակ այդտեղ մնալէ ետք, ձեռամբ Ն.Ս.Օ.Տ.Տ. Արամ Ա. Վեհափառ Հայրապետին, 1 Յուլիս 2022-ին, պիտի կատարուի Միւռոնի օրհնութիւնը։ Աւանդաբար օրհնութիւնը կը կատարուի եօթը տարին անգամ մը, որուն կը մասնակցին զանազան երկիրներէ ուխտաւորներ։
