30.09c
Երեվան
երկ, սպտ 14
ԱՄՆ-ը պատրաստ է Իրանին միջուկային վառելանիւթ մատակարարելու, եթէ Թեհրան հրաժարի ուրան հարստացնելու ծրագիրէն։ Այս մասին Bloomberg-ին տուած հարցազրոյցի ընթացքին յայտնած է ԱՄՆ-ի ուժանիւթի նախարար Քրիս Ռայթ։
Անոր խօսքով՝ Իրան կրնայ անհրաժեշտ միջուկային վառելանիւթը ստանալ արտասահմանէն՝ միաժամանակ դադրեցնելով սեփական հարստացման աշխատանքները։ Ռայթ նշած է, որ նման քայլը Թեհրանին հնարաւորութիւն պիտի տայ վերադառնալու միջազգային հանրութեան հետ համագործակցութեան եւ նպաստելու տարածաշրջանին մէջ խաղաղութեան ու տնտեսական զարգացման։
ԱՄՆ-ի ուժանիւթի նախարարը նաեւ յայտարարած է, որ եթէ Իրան մերժէ Ուաշինկթընի առաջարկը եւ շարունակէ միջուկային զէնք ստեղծելու գաղտնի ծրագիրը, ԱՄՆ-ը պատրաստ պիտի ըլլայ հակազդելու ռազմական միջոցներով։ Միաժամանակ ան ընդգծած է, որ Ուաշինկթընի համար նախընտրելի տարբերակը կը մնայ բանակցութիւններու միջոցով հարցի կարգաւորումը։
Ռայթ յայտնած է նաեւ, որ ԱՄՆ-ը գրեթէ աւարտած է ուրան մատակարարելու սեփական շղթայի ձեւաւորումը։ Անոր խօսքով՝ ամերիկեան կողմը կ՚աւարտէ ուրանին արտադրութեան եւ գործընկեր երկիրներու հետ համագործակցութեան ոլորտին մէջ երկարաժամկէտ պայմանագիրներու կնքումը։
Միաժամանակ, Ուաշինկթընին կը մտահոգէ Իրանէն ներս միջազգային տեսուչներու բացակայութիւնը, որոնք պէտք է վերահսկեն երկրին մէջ ուրանին պաշարներու գտնուելու վայրը եւ անոնց օգտագործումը։ Աւելի վաղ Միջազգային աթոմական ուժանիւթի գործակալութեան ղեկավար Ռաֆայէլ Կրոսին յայտնած էր, որ Իրանի Քիրքա լերան շրջանին մէջ գտնուող միջուկային կառոյցին մէջ աշխուժութիւն արձանագրուած է։
