7.09c
Երեվան
կրկ, հկտ 11
«Ուիքիլիքս»ի բացայայտած նոր տեղեկութիւններու համաձայն, Թուրքիոյ նախագահ Էրտողանի փեսան՝ Պերաթ Ալ Պայրաք, որ երկրի ուժանիւթի նախարարն է, ապօրինի կերպով «Տահէշ»ի մօտ եղած նաւթը Թուրքիա կը տեղափոխէ: Այս մասին կը տեղեկացնէ «Ալ Ճատիտ» լրատուականը:
Աղբիւրը կը յայտնէ նաեւ, որ «Ուիքիլիքս»ի հրապարակած տասնեակ հազարաւոր ելեկտրոնային հաղորդագրութիւններ կը բացայայտեն, որ Էրտողանի փեսան «Իսլամական Պետութիւն» խմբաւորման հետ կապ հաստատած է «Փաուըր Թրանս» կոչուած ընկերութեան մը միջնորդութեամբ, որ նոյնպէս կը զբաղէր ահաբեկչական խմբաւորման նաւթը Թուրքիա տեղափոխելով:
«Ուիքիլիքս» կը նշէ, թէ հակառակ անոր, որ Թուրքիոյ կառավարութիւնը 2011 թուականի որոշումով մը արգիլած էր նաւթի ներածումն ու արտահանումը, սակայն այդ որոշումը «Փաուըր Թրանս»ի վրայ չէ տարածուած:
«Ուիքիլիքս» հրապարակած է նաեւ Ալ Պայրաքի եւ «Քալիք» ընկերութեան մարդկային ռեսուրսներու տնօրէն Պեթուլ Եըլմազի միջեւ փոխանակուած նամակագրութիւնը, ուր «Փաուըր Թրանս» ընկերութեան շահերը հետաքրքրող նիւթեր արծարծուած են:
Յիշեցնենք, որ աւելի շուտ Ալ Պայրաքի հերքած էր նշուած ընկերութեան հետ իր կապը:
Նշենք նաեւ, որ «Իսլամական Պետութիւն» խմբաւորումը իր հարստութեան քառորդը՝ 350-600 միլիոն տոլար ձեռք բերած է Սուրիոյ եւ Իրաքի նաւթի վաճառքէն:
