16.09c
Երեվան
ուրբ, մյս 08
Լրագրող, հրապարակախոս, քաղաքական մեկնաբան, Ֆրանսայի L՚EX-PRESS նշանավոր շաբաթաթերթի փոխխմբագիր Քրիստիան Մակարյանը Ստամբուլի «Ժամանակ» օրաթերթին տված իր հարցազրույցում, խոսելով Հայաստանի 25-ամյա անկախ ճանապարհի մասին, ասել է, որ չնայած այսօր Հայաստանն աշխարհում ճանաչված է իբրև անկախ երկիր, և հայերն այսօր ներկա են բոլոր միջազգային կառույցներում, սակայն, հստակ է, որ Հայաստանի անկախությունը դեռևս ամբողջական չէ. «Հայաստանը դեռևս կախյալ երկիր է, քանի որ իր ճանապարհը դեռևս չի բացել ռազմավարական ուժերի միջև: Իր ճանապարհը ավելի շատ գալարումներով ու ոլորաններով է, քան՝ հստակ: Քանի որ այն փոքր պետություն է, պետք է կա՛մ աջ, կամ ձա՛խ շրջվի, այսինքն պետք է հստակեցնի իր ուղղությունը: Հայաստանը Ռուսաստանի, Թուրքիայի, Իրանի կամ ուրիշ ուժերի միջև է»,- նշել է ֆրանսահայ վերլուծաբանը:
Քրիստիան Մակարյանն ասել է, որ հենց անկախության սկզբից էր պետք հստակ զատորոշել մեծ ուժերի խաղերն ու ազգային շահերը: «Միամտություն է կարծել, թե Ռուսաստանի հետ հատուկ կապ չկա. իհարկե կա և պետք է որ լինի։ Բայց, դեռևս սկզբից Հայաստանը չփորձեց այդ զատորոշումն ու տարանջատումն անել, այդ հստակությունն ապահովել ռուսների հետ: Դա պիտի լիներ Ելցինի ժամանակ, հիմա արդեն ուշ է, մանավանդ՝ Պուտինի օրոք: Սա բաց թողնված հնարավորություն է: Հնարավորություն կար սկզբից ռուսների հետ ուրիշ ձևով աշխատելու: Հիմա դարձել է անկարելիություն»,-ասել է քաղաքական մեկնաբանը:
Նա նաև այն միտքն է հայտնել, որ Հայաստանը պարտավոր է լավ ընկեր լինել Արեւմուտքի հետ։ «Իսկական բարեկամության տեսակետից լավ օրինակ կարող են համարվել Հայաստան-Ֆրանսիա հարաբերությունները։ Պետք է հատկապես շեշտել, որ սա Ռուսաստանի դեմ չէ։ Հայաստանը միշտ պետք է աշխատի զգալ Ռուսաստանի բազկերակը, իր դիվանագիտական գիծը պետք է լինի՝ չափել Ռուսաստանի զայրույթի կետը։ Որտե՞ղ է ռուսների զայրույթի կետը։ Սա պետք է շատ լավ չափել եւ այդ կետը որտեղ որ է՝ մինչև այնտե՛ղ պետք է գնալ Եվրամիության հետ։ Հայաստանն այլևս կարող է որոշ բաներ ասել Ռուսաստանին ու պե՛տք է անի դա: Երբ որ հարցը մեր ապագան է, մեր ժողովրդի բարօրութիւնն է և մեր մշակույթը, ապա մենք ձեզնից ակնկալում ենք, որ Հայաստանն առանձնահատուկ կարգավիճակ ունենա Կովկասում։ Սա պետք է անել և պետք է ասել սա նրանց։
Այսօր Ուկրաինայի հարցը կա, ինչը որ դժվարացնում է ամեն ինչ: Մի օր պիտի լուծվի այդ հարցը, և ամեն ինչ ավելի հանգիստ կլինի: Այդ ժամանակ Հայաստանը կդառնա Կովկասի իսկական եվրոպացին: Որովհետեւ Եվրոպան միայն աշխարհագրական սահմանում չէ։ Եվրոպան ու իր կառույցները խարսխված են արժեքների վրա, և այդ արժեքները նաեւ մեր արժեքներն են. ժողովրդավարություն և զարգացում։ Սա դեմ չէ Ռուսաստանին, սա մեր մշակույթն է։ Սա էր մեր անցյալը և սա պիտի լինի նաեւ մեր ապագան։ Համամարդկային արժեքների մասին է խոսքը։ Հայաստանը ի՛նչ ազդեցության գոտում էլ գտնվի՝ իր դավանած արժեքները համամարդկային են, և այդ արժեքները հարիր են իսկապես անկախ ժողովուրդներին»,-իր հարցազրույցում նշել է Քրիստիան Մակարյանը:
