13.09c
Երեվան
չրք, հկտ 07
Լիբանան- («Ալ Մանար» - Պէյրութ) Լիբանանեան «Հըզպալլա» կուսակցութեան առաջնորդ Սէյիտ Հասան Նասրալլա այսօր պատկերասփռուած ելոյթ մը ունենալով, կոչ ուղղեց Սուրիոյ մէջ պատերազմող իսլամիստ ծայրայեղականներուն իրենց զէքերը վար դնել: Ան մասնաւորապէս ըսաւ, թէ այդ զինեալները կը գործածուին շրջանին մէջ Իսրայէլի եւ Ամերիկայի կողմէ, որ նպատակ ունին քանդել շրջանի քաղաքակրթութիւնները եւ բնաջնջել շրջանի ժողովուրդները: Նասրալլա նաեւ հաւաստեց, որ իրենք պիտի չքաշուին Սուրիայէն, որովհետեւ «եթէ մենք, ինչպէս նաեւ այլ ուժեր հեռանանք Սուրիայէն, ապա այդ կը նշանակէ առիթ տալ Տահէշին, որպէսզի վերջինս տիրապետէ ամբողջ շրջանին»: Նասրալլա նաեւ ըսաւ, որ Տահէշ խմբաւորումը ստեղծուած է Օպամայի վարչակարգին կողմէ, մասնաւորապէս երբ Միջին Արեւելքի համար պատրաստուած «Նոր միջին արեւելք» ծրագիրը ձախողեցաւ: Հասան Նասրալլա, որ կը խօսէր տասը տարի առաջ Լիբանանի դէմ եղած իսրայէլեան «Յուլիսեան պատերազմ»ի 10-րդ տարեդարձին առթիւ նշեց, որ իսրայէլեան բանակը այսօր մեծ անկում մը կ'ապրի եւ այդ անկումը նախ եւ առաջ գաղափարական անկում է: Շիիթ կրօնաւորը, որ Միջին Արեւելքի մեծագոյն զինուորական կազմակերպութեան առաջնորդն է, նաեւ դիտել տուաւ, որ Լիբանանի դէմ եղած պատերազմին հիմնական նպատակը «Հըզպալլա»ի բնաջնջումն էր եւ այդ մէկը չիրականացաւ: Ան նաեւ ըսաւ, որ Իսրայէլի այսօրուան ղեկավարութիւնը եւ հասարակութիւնը յայտնուած են լուրջ տագնապներու մէջ եւ Իսրայէլի բանակին, քաղաքական ղեկավարութեան եւ հանրութեան միջեւ վստահութեան բոլոր օղակները խախտուած են: Աւարտին ան յայտարարեց, որ այսօրուան պատկերով Իսրայէլի մէջ չկայ կէտ մը, որ անհասանելի է «Հըզպալլա»ին համար:
